«Մամային կրակեց, պապան տեսավ, ընկավ». 4-ամյա Սալին պատմում է Թուրքիայում իր մոր սպանության մասին

ԳԱԼԱ-ն ավելի վաղ հրապարակել էր, որ Թուրքիայում սպանել են Գյումրու Մուշ թաղամասում բնակվող մի կնոջ, և նրա դիակը տեղափոխել են Հայաստան: Նա ամուսնացել էր ազգությամբ թուրք մի տղամարդու հետ, երեխաներ ուներ: Նրան երեխաների աչքի առաջ սպանել էր իր ամուսնու եղբայրը՝ տեգրը:

ԳԱԼԱ-ի թղթակցին հաջողվել է նոր մանրամասներ պարզել Թուրքիայում սպանված կնոջ մասին: Կինը բնակվելիս է եղել Մուշ 2 թաղամասում: Նա ազգությամբ եզդի էր, բայց, հարևանների պատմելով, ամբողջ կյանքն ապրել է Հայաստանում՝ Գյումրիում: Նա հայկական սովորույթներով էր ապրում, խոսում էր հայերեն: Արդեն 12 տարի էր` ամուսնացած էր ազգությամբ թուրք տղամարդու հետ: Ամուսնական զույգը իրար շատ էր սիրում և լավ հասկանում էր իրար:

«Էնքան սիրով էին, էլ ասելու չէր: Մի անգամ գիշերով տեսանք մարդուն (ինքն էլ էր հայերեն սովորել), հարցնում ենք՝ ու՞ր, ասաց. «Մայայիս սիրտը ձուկ է ուզում, գնում եմ` ձուկ բերեմ ձորից»:

Մայան երկու երեխա ուներ իրանից, բայց երեք էլ ուներ` մինչև թուրք տղամարդուն հանդիպելը: Հիմա շատ մանրամասներ չգիտենք: Գիտենք միայն, որ գնացել էր Ստամբուլ՝ ամուսնու մոտ, ու իրան անցած գիշեր բերել են այնտեղից», - պատմեց սպանված կնոջ հարևաններից մեկը:

Հարևանները պատմեցին նաև, որ Մայայի ամուսինը սթրեսի մեջ է. նա անգամ խոսել չի կարողանում: «Ոնց որ խեղճ տղայի գլխին տված լինեին, սարսափելի էր, եկան կանչեցին Գյումրու ոստիկանություն, գնաց», - պատմեցին մահացածի տան դիմաց հավաքված տղամարդիկ:

Հարևանները ասացին նաև, որ շատ բան չեն հասկանում, քանի որ Մայայի բնակարանում հավաքված եզդի կանայք հիմնականում իրենց լեզվով են խոսում:

Սպանված կնոջ մորեղբոր դուստրը, ով դարձյալ ազգությամբ եզդի է՝ Բահրամ Բեսին, ԳԱԼԱ-ին պատմեց. «Այ սրանց հորեղբայրն է կրակել (ցույց տալով Մայայի որդուն), իրանց աչքի դիմաց, իրան հարցրու, հեսա կպատմի, ասել է` իբր թռչուն էր կրակում...»:

Կնոջը ընդհատեց սպանված կնոջ` Մայայի կրտսեր որդին` չորսամյա Սալին, ով ասաց. «Մորքուր, խաբում են, թռչուն չէր կրակում, ինքը բռնեց, մենք կերթաինք, որ պտի լողցներ մաման ինձի, ինքը մամային կրակեց: Ես հետո գնացի պապային գոռացի, պապան եկավ, ընկավ վար: Հետո դրեցին ավտոյի մեջ, մամայիս տարան հիվանդանոց»:

ԳԱԼԱ-ին հաջողվեց պարզել նաև, որ Մայայի ազգությամբ թուրք ամուսինը ևս կին ու երեխաներ ունի Թուրքիայում: Հարազատները պատմեցին, որ Մայային Թուրքիայում չեն սիրել: