Ժվանեցկին՝ հայ հանդիսատեսի մասին. Ես պատրաստ եմ նման դահլիճի և հանդիսատեսի համար ամեն ինչ տալ

Հունիսի 15-ին «Բեմ փրոդաքշն» ընկերությունը ներկայացրեց գրող-երգիծաբան Միխայիլ Ժվանեցկու հեղինակային երեկոն։ «120 րոպե' Ժվանեցկու հետ» խորագրով նոր ծրագիրը 2 ժամ շարունակ ժպիտ պարգևեց հանդիսատեսին։

Երեկոյից հետո Ռուսաստանի Դաշնության և Ուկրաինայի ժողովրդական արտիստ Մ. Ժվանեցկին հանդիպեց լրագրողների հետ, պատասխանեց նրանց հարցերին։ Երգիծաբանը նշեց, որ հայ հանդիսատեսն ու Հայաստանը հաճելիորեն զարմացրել են իրեն։ «Հանդիսատեսի՝ ռուսական հումորի ընկալումն ինձ զարմացրեց։ Ես սկզբից շատ արագ սկսեցի, սակայն հետո սկսեցի խոսել դանդաղ, և ամեն ինչ հունի մեջ ընկավ: Ամեն ինչ տեղի ունեցավ այնպես, ինչպես երկուսս էինք ուզում՝ ես և նա: Եսը ես եմ, իսկ նա' հանդիսատեսը։ Ես պատրաստ եմ նման դահլիճի և հանդիսատեսի համար ամեն ինչ տալ։ Երևանյան երեկոյի ընթացքում իշխում էր փոխադարձ հիացմունքի մթնոլորտը։ Հայաստանում հրաշալի ընկալում են ռուսական հումորը»,- ասաց երևանյան հանդիսատեսից տպավորված արտիստը:

Նա նկատեց նաև հայերի աշխատասիրությունը։ «Հայ ժողովուրդը ստիպված է անգամ մրգերն ու բանջարեղենը քարից քարից քամել, ինչը շատ դժվար է»,- ասաց երգիծաբանը։

Մ. Ժվանեցկին նշում է, որ մենք հիմա ապրում ենք մի ժամանակներում, երբ տեղի է ունենում արժեքների վերագնահատում։ Նա կարծում է, որ անկեղծությունն աստիճանաբար դառնում է թանկարժեք ապրանք։

Համեմատելով խորհրդային հումորը ներկա ժամանակների երգիծանքի հետ՝ Ժվանեցկին նշեց, որ այսօր խոսում են ամեն ինչի մասին, սակայն մակերեսորեն։

«Բեմ փրոդաքշըն» ընկերություն