Այսօր քանդակագործ Լևոն Թոքմաջյանի ծննդյան օրն է

Քանդակագործ Լևոն Թոքմաջյանը ծնվել է 1937թ. հունիսի 16-ին Երևանում:

1952-57թթ. սովորել է Երևանի Թերլեմեզյանի անվան գեղարվեստի ուսումնարանում, 1957-63թթ' Գեղարվեստի պետական ակադեմիայում, 1963-75թթ.` Երևանի Կոմիտասի անվան պետական կոնսերվատորիայում: Երգել է Հայաստանի պետական երգչախմբում:

Հեղինակել է բազմաթիվ քանդակներ` Երևանի և Դոնի Ռոստովի «Մարտիրոս Սարյան» հուշարձաններ, Նիկոսիայի հայ մեծանուն գործիչներին կերտող 16 քանդակագործական աշխատանքներ, Հունաստանի Ամարոսի քաղաքի կենտրոնում կանգնեցված հույն ազգային հերոս «Սպիրոս Լուիս» հուշարձան, Մարսելի կոնսերվատորիայի մուտքի մոտ կանգնեցվեց «Արամ Խաչատրյան» բրոնզե քանդակ, Մարտունիի «Մոնթե Մելքոնյան» մարմարե հուշարձան, Երևանի «Ծաղիկ նվիրող Կարա-Բալա», «Լեոնիդ Ենգիբարյան» բրոնզե քանդակներ, Հունաստանի Օլիմպիա քաղաքի «Վարազդատ Արշակունի», Ղրիմի «Այվազովսկի Եղբայրներ» մարմարե քանդակներ և այլն:

1975թ. Լեհաստանի Օրոնսկ քաղաքում «Ղարաբաղցի կինը» քանդակի համար արժանացել է «Գրան Պրի» մրցանակի:

1981թ. Իտալիայի Ռավեննա քաղաքում Դանթեին նվիրված բիենալեի ժամանակ արժանացել է ոսկե մեդալի և քաղաքի պատվավոր դիպլոմի: 1986թ. Թբիլիսիի անդրկովկասյան երկրների կերպարվեստի բիենալեում «Գործող կինը» ստեղծագործության համար` «Գրան Պրի» մրցանակի:

2010թ. արժանացել է Էջմիածին քաղաքի պատվավոր քաղաքացու կոչմանը' Էջմիածնում կատարած գործերի և վաստակի համար, և «Թեքեյան» ամենամյա մրցանակի:

1969-ից Հայաստանի Նկարիչների միության անդամ է, 2008թ-ից` ԵՃՇՊՀ գծանկարի, գունանկարի և քանդակի ամբիոնում դասախոս, պրոֆեսոր: Եվրասիական միջկոնտինենտալ, միջազգային գեղարվեստի ակադեմիայի իսկական անդամ, ակադեմիկոս է: Արժանացել է ՀՀ ժողովրդական նկարչի կոչմանը:

2010թ. Արգենտինայում մասնակցել է համաշխարհային բիենալեի, 2008թ., 2009թ. և 2010թ. Պենզայում` Քանդակի միջազգային սիմպոզիումի:

2011թ. Էջմիածնում կանգնեցվել է նրա կերտած 1915թ. Հայոց Եղեռնին զոհ դարձած 12 հայ մտավորականների խմբակային բազալտե հուշարձանը: