Տեղի կունենա Լարիսա Գևորգյանի «Հավատարիմ՝ ինքնությանը» և «Երեք օրից հետ կգամ, մամ...» գրքերի շնորհանդեսը

Գերմանիայի Հայ Ակադեմիականների Միությունը (ՀԱՄ) կազմակերպում է հայ գրող և հրապարակագիր Լարիսա Գևորգյանի վերջին երկու`«Հավատարիմ՝ ինքնությանը» և «Երեք օրից հետ կգամ, մամ...» գրքերի շնորհանդեսը:

Այն տեղի կունենա կիրակի, հունիսի 23-ին, ժամը 15:00-ին:

Հասցեն՝ Lutherhaus Bochum, Wittener Str. 242, 44803 Bochum, Deutschland

Տպագրված են հեղինակի հետևյալ 7 գրքերը.

1. Արև՝ լեռան մեջ, խոհափիլիսոփայական էսսեների ժողովածու, Երևան, 2005,

Վան Արյան հր-ն, 204 էջ.

2.Ես տեսա իմ երկիրը, վավերագիրք, Երևան, 2005, Վան Արյան հր-ն, 240 էջ.

3.Աղի համը, վիպակ, Երևան, 2007, Գաս Պրինտ հր-ն, 192 էջ.

4. Փշալարով շուլալված խաչ, վավերագիրք, Երևան, 2007, Գաս Պրինտ հր-ն, 292 էջ.

5. Խիղճ, վեպ, Երևան, 2007, Գաս Պրինտ հր-ն, 440 էջ.

6. Հավատարիմ' ինքնությանը, վավերագիրք, Երևան, 2011, Նոյյան տապան, 340 էջ.

7. Երեք օրից հետ կգամ, մամ..., պատմվածքների ժողովածու, Երևան, 2012, Էդիտ Պրինտ հր-ն, 214 էջ:

Հեղինակի ևս հինգ գիրք արդեն պատրաստ է տպագրության:

Լույս տեսած գրքերի շնորհանդեսները տեղի են ունեցել Երևանում, Մոսկվայում, Մոնրեալում, Դեն Հագում, Բոխումում, Քյոլնում, Մայնի Ֆրանկֆուրտում, Դյուսելդորֆում և Համբուրգում:

«Հավատարիմ՝ ինքնությանը» Հայ ավետարանական եկեղեցու առաջնորդներից վերապատվելի Ռընե Լևոնյանի և նրա տիկնոջ՝ Սիլվի Լևոնյանի՝ Հայաստանում և Սփյուռքում ծավալած գործունեության մասին է, ֆրանսահայերի նշանակալի ներդրման մասին երկրաշարժի գոտու, Արցախի, Հայ դատի պաշտպանության խնդրում:

Լարիսա Գևորգյանի վերջին գիրքը՝ «Երեք օրից հետ կգամ, մամ...» պատմվածքների ժողովածուն (5 պատմվածք), նվիրված է արցախյան ազատամարտում' Բերդաձորում հերոսաբար զոհված հետախույզ Վաղինակ Զաքարյանի հիշատակին: Բացի հետախույզ նահատակի մասին սրտախոս պատմվածքից' գրողը սույն ժողովածուում անդրադառնում է նաև հայ և թուրք ժողովուրդների հարաբերություններին, այստեղ խոստումնալից ծիլ տեսնում և այդպիսիք հրամցնում գրական յուրատեսակ տարբերակով: Հեղինակը հավատամք ունի՝ ընտանիքը պետության բջիջն է, առանց որի չի կարող գոյություն ունենալ ամուր պետություն: Սա է այն ընդհանրական հենքը, որ միավորում է ժողովածուի բոլոր պատմվածքները: Ըստ Արմենպրեսի հաղորդագրության՝ ընթացիկ տարվա փետրվարին այդ գիրքը քանիցս ներառվել է երևանյան բեսթսելլերների ցանկում:

Գրական երեկոն կուղեկցվի ՀԱՄ-ի անդամներ Արմինե Ղուլոյանի (դաշնամուր) և Ալիսա Եփրեմյանի (ջութակ) երաժշտական համարներով:

Երեկոն կվարի Ազատ Օրդուխանյանը: