Աննա Բաբայան VS Քիմ Քարդաշյան

«Կարգին սերիալում» նկարահանվող, մոդել Աննա Բաբայանին հաճախ են համեմատում հայազգի աստղ Քիմ Քարդաշյանի հետ: Այս առիթով մեր խմբագրություն հրավիրեցինք Աննային ու փորձեցինք պարզել՝ որքան է նա նման ռեալիթի շոուների աստղ Քարդաշյանին: «Ճիշտն ասած, ինքս էլ լսել եմ նման խոսակցություններ այն ժամանակ, երբ Իսպանիայում էի: Ինքս չեմ նմանեցնում ու երբեք էլ չեմ նմանեցրել: Շատ ավելի նման մարդիկ կան: Կարծում եմ՝ խոսքն արտաքին նմանության մասին է. դժվար թե Քիմին բնավորությամբ ինչ-որ մեկը ճանաչի: Գուցե աչքերի նմանություն լինի, սակայն կարծում եմ' հայերի աչքերն այսպես թե այնպես տարբերվում են բոլոր այլ ազգերի աչքերից»,- զրույցի սկզբում ասաց 29-ամյա Աննան:

Աննա Բաբայանի կարիերան

Աննա Բաբայանի մոդելային կարիերայի սկիզբը 2000 թվականն էր, երբ նա որպես մանեքենուհի մասնակցեց ցուցադրությունների: Աննան մոդելային քայլվածք սովորել է «Հայաստանի նորաձևության տանը», որից հետո մոտ չորս տարի պոդիումում է եղել: Հետագայում՝ 2008-ին, նկարահանվել է «Երեկոյան շոուն Արմենի հետ» հաղորդաշարում, ու վարել է «Բլից» հաղորդումը: Ֆոտոմոդելի հետագա գործունեությունը շարունակվել է Իսպանիայում, որտեղ ապրում է Աննայի հարազատ քույրը՝ Ալինա Բաբայանը, ով արևելյան պարերով է զբաղվում: «Այնտեղ բնակարան ու սեփականություն գնեցինք, ու ես տեղափոխվեցի քրոջս մոտ, իսկ ծնողներս մնացին այստեղ»,-ասաց Աննան:

Աննան առիթներ ունեցել է հանդես գալու որպես գովազդային դեմք, իսկ Իսպանիայում լուսանկարվել է որոշ ամսագրերի համար, որոնք, սակայն, համաշխարհային ճանաչում չունեն: «Իսպանիայում ֆոտոմոդելի աշխատանքը քրոջս միջոցով եղավ, ով իմ լուսանկարները տեղադրել էր որևէ կայքում, ինչի արդյուքնում ես առաջարկներ էի ստանում»,- ասաց նա:

Ընտանիք

«Կարգին սերիալ»-ում Էմանուելլայի կերպարը մարմնավորող Աննայի հայրը՝ Գագիկ Բաբայանը, հաշմանդամ մարդկանց համար նախատեսված «Պրոթեզաօրթոպեդիկ» պետական հաստատության տնօրենն է. կենտրոնն անվճար պարագաներ է տրամադրում բոլոր հաշմանդամ մարդկանց և ֆինանսավորվում է պետության կողմից: Մանեքենուհու մայրն էլ՝ Մարինե Սարգսյանը, 13 տարի է՝ աշխատում է Պաշտպանության նախարարությունում, կոչումով փոխգնդապետ է և շուտով գնդապետ կդառնա:

Սեփական բիզնես

Աննայի խոսքերով՝ տարվա կեսն Իսպանիայում է ապրում: «Այնտեղ ապրելու իմ արտոնությունն այդպիսին է»,- նշեց նա: Իսպանիայում ֆոտոմոդելն ու քույրը տարածք ունեն, որի մի մասը ծառայում է որպես պարի ստուդիա, իսկ մյուս մասը՝ դիմահարդարման սրահ: Ի դեպ, Աննան նաև դիմահարդար է, ու դրա հմտությունները յուրացրել է թեհրանցի մի աղջկա մոտ, այնուհետև վերապատրաստվել է Դուբայում ու Պարսկաստանում: «Որպես դիմահարդար՝ ինձ համար հաճելի է աշխատել Իսպանիայում. այնտեղ ավելի հեշտ են իմպրովիզների համաձայնում, իսկ Հայաստանում՝ մշտապես նույն ոճն է: Հետաքրքրիրն այն է, որ տղաների հետ էլ եմ շատ աշխատել»,- նշեց 29-ամյա մոդել դիմահարդարը: Հարցին՝ երբևէ ցանկություն չի՞ ունեցել սեփական ապրանքանիշն ունենալ՝ պատասխանեց.«Նախ երբևէ չեմ ցանկացել ծնողներիս գումարների հետ իմպրովիզներ անել: Իսկ ինչ վերաբերում է Քարդաշյաններին, ապա կարող եմ ասել, որ ոչ թե նրանք են անում այդ ամենը, այլ պարզապես վաճառում են իրենց անունը՝ որևէ բրենդ ստեղծելու համար: Եթե ինչ-որ մեկին հետաքրքրի իմ անունը, կհամաձայնեմ, բայց ադպիսի բարդ-բիզնես ինքս չեմ կարողանա սկսել»:

Անձնական կյանք

esyes.am-ն արդեն ներկայացրել էԱննային ու նրա ընտրյալին՝ Թեհրանաբնակ երաժիշտ Ալեն Բարսեղյանն է: Այժմ ֆոտոմոդելն անձնական կյանքի հետ կապված՝ դեռևս չգիտի, մշտական բնակության կմեկնի Իսպանիա, թե՝ ոչ: «Դեռ չենք որոշել, թե ամուսնությունից հետո որտեղ ենք ապրելու: Ես շատ կուզենամ, որ Իսպանիայում ապրենք, բայց չեմ կարող երկուսիս փոխարեն որոշել: Հունիսին միասին պետք է մեկնենք, ու արդեն պարզ կլինի՝ նա այնտեղ կկարողանա աշխատել, ապրել»,- ասաց Աննան: Նրա խոսքերով' իր համար հարսանիքն առաջնային չէ և կարող է ամուսնանալ նույնիսկ առանց դրա. «Ինչ լինելու է, այս տարի կլինի: Հարսանիքի ու քեֆի մասին երբեք չեմ մտածել: Ինձ ավելի շատ հետաքրքիր էր, թե այդ մեկ օրից հետո ինչպիսի հարաբերություններ կլինեն, այսինքն՝ ամուսին ունենալու փաստն ինձ համար ավելի կարևոր է: Եթե հարմար չլինի, կհամաձայնեմ հարսանիք չանելուն»:

Քիմ Քարդաշյան

Որտեղից ենք հիշում Քիմին. կարիերայի սկիզբը

Մինչև 2006-2007թթ. Քիմ Քարդաշյան անունը հսատատ այսպես չէր թնդում աշխարհում: Նա հայտնի դարձավ համացանցում մեծ աղմուկ բարձրացրած սեքս-վիդեոյից հետո և հիշեցրեց իր ազգանվան մասին: Նա մեկ օրում իրեն ճանաչել տվեց ու մինչև այսօր՝ ամեն օր՝ նոր PR «սխրանքների» ու այլ սկանդալների միջոցով մշտապես ուշադրության կենտրոնում է պահում իր անունը: Հայտնիության առաջին պտուղներից հետո Քիմին մնում էր պահպանել այն: Իրական հեռուստաշոուի և իր անվան շուրջ բարձրացրած սկանդալների շնորհիվ շուտով Քիմը դարձավ ամենացանկալի ու սեքսուալ կանանցից մեկն ամբողջ աշխարհում: Նա դարձավ նաև շատ երեկույթների ու միջոցառումների սպասված հյուր:

Ընտանիք

Քիմ Քարդաշյանը ծնվել է 1980 թվականի հոկտեմբերի 21-ին Լոս Անջելեսի Կալիֆոռնիա նահանգում: Նա հայկական արմատներ ունի հոր կողմից, շոտլանդացու և հոլանդացու ծագում՝ մոր կողմից: Ռեալիթի շոուների հայտնի աստղը հայտնի իրավաբան Ռոբերտ Քարդաշյանի և հայտնի պրոդյուսեր Քրիս Ջենների, ով Քիմի մենեջերն է, …. Քիմի մայրը Ռոբերտ Քարդաշյանից բաժանվել է 1989թ. և 1991-ին ամուսնացել է թեթև աթլետիկայի հայտնի մարզիկ Բրյուս Ջենների հետ: Քիմ Քարդաշյանն ունի երկու քույր՝ Քլոե Քարդաշյանը, Քորթնի Քարդաշյանը և մեկ եղբայր՝ Ռոբերտ Քարդաշյանը: Մյուս երկու քույրերը՝ Քենդալ Ջեններն ու Քայլի Ջենները, հարազատ են միայն մորական կողմից:

Սեփական բիզնես

Քարդաշյան ընտանիքն ունի ոճի սեփական ստուդիա, Քիմը թողարկեց սեփական օծանելիքը և այլն: 2011-ին նա Լոնդոնում ներկայացրեց սեփական բույրը և խոստովանեց, որ այս բուրմունքի ստեղծումը երկար ժամանակ է պահանջել իրենից, բայց հաջողացրել է գտնել այն, ինչ փնտրում էր՝ «մանկության հոտը»: Իսկ Քիմի մանկությունը բուրում է հասմիկով, վարդով, մանուշակով և թուրինջով:

Անձնական կյանք

Քիմ քարդաշյանի անձնական կյանքը, կարելի է ասել, մի քանի անգամ դասավորվել ու փլուզվել է: 2011-ի օգոստոսի 20-ին նա ամուսնացավ Քրիս Համֆրիզի հետ, ում հետ ամուսնական կյանքը շատ կարճ տևեց: Ռեալիթի շոուների հայտնի աստղ Քիմ Քարդաշյանն այնքան հաճախ է PR քայլեր անում, որ նրա հերթական ամուսնության, ամուսնալուծության կամ հղիության մասին լուրերը ոչ միշտ են միանշանակ ընդունվում:

Նրա և ռեփեր Քենի Ուեսթի բալիկի սպասելու մասին լուրերից հետո խոսակցություններ կային, որ Քիմի հղիության մասին լուրերը հերթական PR ակցիան են, սակայն պապարացիների արած լուսանկարներից պարզ դարձավ, որ Քիմն իսկապես փորիկով է: Հիշեցնենք, որ զույգի առաջնեկի մասին լուրը հայտնի դարձավ Ատլանտիկ Սիթիում ռեփերի համերգի ժամանակ, երբ Քենին հայտարարեց իրենց երջանկության մասին: Դեռևս այն ժամանակ Քիմն ասել էր, որ հղիությունը հաճույք չէ: «Ես չէի ասի, որ հղի լինելը հեշտ է: Երբ մարդիկ ասում են, որ հղիությունը հաճույք է, և դա նրանց դուր է գալիս, ես ստիպված եմ չհամաձայնել»,- ասել էր Քիմն ու հավելել, որ ինքն ուզում է առողջ և գեղեցիկ մնալ հղիության ընթացքում:

Հ. Գ- Թեև երբևէ Քիմ Քարդաշյանի հետ հարցազրույց չեմ արել ու չգիտեմ՝ ինչպես է նա ներկայանում, սակայն Աննան հարցազրույցի եկել էր բավականին շքեղ ու գեղեցիկ դիմահարդարմամբ, ինչի պատճառը, ըստ նրա, զրույցից հետո կայանալիք հանդիպումն էր:

esyes.am