Իշխան Զաքարյանն ամփոփեց ՎՊ հաշվետվության քննարկումները

Ազգային ժողովում այսօր ավարտվեց Վերահսկիչ պալատի՝ 2012 թվականի տարեկան հաշվետվության քննարկումը։

Ամփոփիչ ելույթով հանդես եկավ ՎՊ նախագահ Իշխան Զաքարյանը։

«Շուրջ 50 պատգամավոր 188 հարցի միջոցով փորձեց վեր հանել այն եզրակացությունը, ինչը մենք ներկայացրել էինք Ազգային ժողով, և շուրջ երեք տասնյակ ելույթներով փորձեցին տարբեր գնահատականներ տալ։ Իհարկե, ես զերծ եմ մնալու քաղաքական ենթատեքստ ունեցող գնահատականներից, զերծ եմ մնալու դրանց այլ որակումներ տալուց, որովհետև ես ասել եմ, որ ՎՊ-ի հաշվետվությունը երբեք քաղաքական դաշտ չպետք է տանել», - ասաց Զաքարյանը:

Վերջինս խոսեց «համատարած թալան» արտահայտության մասին, որը հնչել էր Ազգային ժողովում քննարկումների ժամանակ։

«Հաշվետվությունը ձեր սեղանին է. խնդրում եմ ցույց տալ, թե «համատարած թալան» արտահայտությունը որտեղ է օգտագործված, և քաղաքական ինչ գնահատականներ ենք մենք տվել: Չկա այդպիսի բան»,- ասաց ՎՊ ղեկավարը:

Իշխան Զաքարյանն անդրադարձավ սեպտեմբերի 15-ին Սերժ Սարգսյանի խորհրդակցությանը և կարդաց այդ օրը Կառավարության նիստում քննարկված տեղեկանքից մի փոքր հատված:

«Ես կարծում եմ, որ այն, ինչ ներկայացրել է ՎՊ-ն իր հաշվետվության մեջ, շատ ավելի վեղմ է ասված, քան այն, ինչ որ հանրապետության նախագահն ասել է սեպտեմբերի 15-ին: ՎՊ-ն շատ հստակ ասում է՝ վերահսկողությամբ դեռևս բացահայտվում են հակամրցակցային, անարդյունավետ, ոչ թափանցիկ, հրապարակային հիմքերով կազմակերպված գնման գործընացներ։ Դեռևս բացահայտվում են։ Սա ամենևին չի նշանակում, որ համատարած են այդ երևույթները:

Մենք ունենք բնագավառներ, որտեղ նախարարները շատ հստակ շահագրգռված են այս երևույթները բացահայտելու գործում: Այս տեմպերով եթե շարունակենք, մինիմալ չափերի ենք հասցնելու կոռուպցիոն ռիսկերը:

Ես խնդրում եմ՝ այն տպավորությունը չստեղծվի, որ ՎՊ-ն գնաց վերահսկողության կամ ստուգման, ինչ տեսավ, միանգամից արձանագրում է՝ առանց որևէ կարծիք լսելու, և ներկայացնում է հանրության դատին», - ասաց Իշխան Զաքարյանը:

ՎՊ նախագահը խոսեց նաև Վերահսկիչ պալատ-Կառավարություն և Վերահսկիչ պալատ-Դատախազություն փոխհարաբերությունների մասին:

«Այստեղ ես պետք է միանշանակ ասեմ, որ կիսում եմ Հրայր Թովմասյանի կարծիքը, որ Վերահսկիչ պալատ-Կառավարություն փոխհարաբերությունները պետք է լինեն գործընկերային, և Կառավարության ամենամեծ դաշնակիցը պետք է լինի ՎՊ-ն։ Այդպես էլ կա: Ցանկացած խնդիր, որի մասին խոսում ենք, տալիս ենք մեր առաջարկությունները: Կառավարության հետ կապված՝ թող այն տպավորությունը չստեղծվի, որ մենք անընդհատ փորձել ենք սևը սպիտակեցնել, կամ՝ լավը չտեսնել:

Վերահսկիչ պալատ-Դատախազություն հարաբերությունների մասին. Ասեմ հստակ մի բան, որ ՎՊ-ի նախագահը դատախազի և Դատախազության հետ կապված որևէ հայտարարություն չի արել: ՎՊ-ի նախագահը շատ լավ գիտի, որ ցանկացած կառույցի գնահատականը տալիս է այն օղակը, որը նշանակում է այդ կառույցը, կամ որը պատասխանատու է այդ կառույցի գործունեության համար:

ՎՊ-ն այս տարիների ընթացքում Դատախազություն ուղարկել է շուրջ 30 գործ: Չկա մի գործ, որի հետ կապված քրեական գործ չհարուցվի: Հարուցված քրեական գործերից 90 տոկոսի արդյունքները բավարարել են ՎՊ-ի, Դատախազության մասնագետներին և հասարակությանը: Խնդիր. Թե ինչու ՎՊ-ն այդ գործերը չի ուղարկում Դատախազոթյուն։ Ավելի շատ ընդունում եմ և կարծում, որ ՎՊ-ն այս սխալը կշտկի», - ասաց Իշխան Զաքարյանը:

«Ես կողմնակից եմ բոլոր այն պատգամավորներին, որ ժամանակն է արդեն, որ մենք ավելի խիստ, ավելի լուրջ մոտեցումներ ունենանք բոլոր այն կառույցների, այն կառույցների ղեկավարների, անհատների, պաշտոնյաների նկատմամբ, ովքեր բացասական կամ այլ կարգի վերաբերմունք ունեն պետական բյուջեի ծախսային մասի հետ կապված», - նշեց ՎՊ նախագահը: