Էս ո՞ւր, հոպլո՛

Գեներալներ Մանվել Գրիգորյան-Սեյրան Սարոյան զույգի և Սամվել Ֆարմանյանի հեղինակած «Երկրապահ կամավորականի կարգավիճակի մասին» օրինագծի քննարկումն արդեն երկրորդն օրն էր՝ ընթանում էր արտակարգ ռեժիմով:

Ճիշտ է, գեներալներին անպարտաճանաչ պատգամավոր անվանել չի կարելի՝ երկուսն էլ երևի թե հազվագյուտ բացակայություններ են գրանցել իրենց հաշվեկշռում, բայց այն, որ հնարավոր էր ամենաանկարգ, ամենաանպարտաճանաչ պատգամավորներին ստիպել մինչև օրվա վերջ «լռվել» ԱԺ-ում, գրեթե ֆանտաստիկայի շարքից էր: Բայց արի ու տես, որ այն, ինչ հաջողվեց երկրապահներին պատերազմի օրերին, իրենց «չուլուչփլաղ» հալին հաղթել թվապես ու տեխնիկապես գերազանցող թշնամուն, հաջողվեց նաև այս օրինագիծը ներկայացնողներին: Իսկ թե ինչպես, դա արդեն այլ թեմա է:

- Էս ո՞ւր, հոպլո՛,- բացականչեց դահլիճից դուրս եկող ու հեռացող Ռուբեն Հակոբյանի դեմ դուրս եկած Սեյրան Սարոյանը: Գեներալներն օրինագծի քննարկումից մի կես ժամ շուտ շտապում էին դահլիճ՝ ճանապարհին կազմակերպչական կանխարգելիչ միջոցառումներ ձեռնարկելով:

- Յա՜, չեղավ, հոպլո՛,- երկրորդեց գեներալ Սեյրանը՝ հաջորդ «դասը» զիջելով ընկերոջը:

Մանվել Գրիգորյանն արդեն առանց բացականչությունների՝ բանակցությունների մեջ մտավ «Ժառանգություն» խմբակցության ղեկավարի հետ, ընդունեց բացատրությունները, որից հետո «կտրած» ճանապարհը բացեց.

- Լա՛վ, տե՛ս, գնա՛, բայց որ 20 րոպեից ըլնես,- ըստ երևույթին զուգարան գնացող պատգամավորին թույլտվություն շնորհեց գեներալը:

Գեներալներն էլի մի քանի քայլ արեցին դեպի դահլիճ:

- Յա՜, էս ո՞ւր, նխշուննե՜ր,- այս անգամ Սեյրան Սարոյանի «զոհերը» ՀՀԿ–ական կանայք էին: Տիկնայք էլ նույն բախտին արժանացան, ինչ ընդդիմադիր պատգամավորը՝ բացատրություններ, նախազգուշացում…

- Պարոն գեներա՛լ, կարո՞ղ է Ձեզ Ազգային ժողովի նախագահ ընտրեն, որ բոլոր նիստերն էս ձևով կազմակերպեք:

- Դե բա, կռվից թռան՝ հիմի էլ թռնե՞ն, ըտենց ո՞նց կլնի, - ժպտում է պատգամավոր Սարոյանը:

Օրինագծի երկրորդ ընթերցումը ևս անցնում է բարձր մակարդակով, ընդունվում՝ «բարձրագույն»: Գեներալիտետին մինչև դահլիճ ուղեկցող, հետո էլ դահլիճից դիմավորող «սվիտան» քվեարկությունների ժամանակ հենց հերթը հասնում է «Երկրապահին», թափով ոտքի է ելնում և հոտընկայս դիմավորում շեֆերի օրինագիծը՝ իհարկե, առանց «չեստ տալու»: Կողմ՝ 97, զրո դեմ, զրո ձեռնպահ:

Բացատրական աշխատանքներից զատ, Սեյրան Սարոյանը նաև, այսպես ասած, «քֆուր էր դրել» գործընկեր-պատգամավորների վրա՝ Նահապետ Գևորգյանին (Նովո) նախազգուշացնելուց հետո հետևից վրադիր գոռալով՝ «ով չգա՝ Ալիև ա»:

- Սամո՞, բա հիմի դու ո՞նց ես լրատվությանը բացատրելու, որ չես քվեարկել,- արդեն քվեարկությունից հետո ուշացած Սամվել Ալեքսանյանի «ականջներն էր քաշում» գեներալ Մանվել Գրիգորյանը:

Արդեն երկու ժամ հետո քվեարկությանը չմասնակցածների ամբողջական ցուցակը դրված էր խորհրդարանի կայքում՝ Սամվել Ալեքսանյան, Արկադի Համբարձումյան, Դավիթ Հարությունյան, Արտակ Սարգսյան, Արթուր Ստեփանյան, Ռուբեն Սադոյան, Արայիկ Գրիգորյան, Մելիք Մանուկյան, Գագիկ Ծառուկյան, Էդմոն Մարուքյան, Կարեն Կարապետյան, Արման Սահակյան, Մուշեղ Պետոյան, Վահե Հակոբյան, Աշոտ Արսենյան, Կարեն Ավագյան, Սուքիաս Ավետիսյան, Մարտին Սարգսյան, Համլետ Հարությունյան, Նաիրա Կարապետյան, Արմեն Մխիթարյան, Վարդան Օսկանյան, Վահե Հովհաննիսյան, Էլինար Վարդանյան, Ռուբեն Գևորգյան, Վահան Բաբայան, Տիգրան Ուրիխանյան, Ռուստամ Գասպարյան, Հարություն Ղարագյոզյան, Արագած Ախոյան, Տիգրան Ստեփանյան, Գրիգոր Գրիգորյան, Բազմասեր Առաքելյան, Արա Արամյան, Հրանտ Բագրատյան, Վահան Հովհաննիսյան, Աղվան Վարդանյան, Արմեն Բաբայան, Թևան Պողոսյան, Խաչատուր Քոքոբելյան, Ալեքսանդր Արզումանյան, Իշխան Խաչատրյան, որոնց մի մասն ուղղակի բացակա էր այսօր, մի մասը՝ պարզապես «ուշացել էր ճակատամարտից»: Ի դեպ, Մանվել Գրիգորյանի եղբորորդի Հրանտ Գրիգորյանի դիմաց ևս գրանցված էր՝ «չի քվեարկել», այսինքն՝ մարդն այդ օրը եկել էր խորհրդարան, գրանցվել, բայց քվեարկությանը չէր մասնակցել՝ դիտավորյալ, թե չկանխամտածված՝ գիտի ինքը:

Լուսինե Կեսոյան