Ինտերնետը սեքսից և ուտելիքից կարևոր է. հարցում

Բրիտանական TP-Link հեռուստակոմունիկացիոն սարքավորումներ արտադրող ընկերությունը հարցում է անցկացրել Մեծ Բրիտանիայում  իր բաժանորդների միջև այն թեմայի շուրջ, թե իրենց կյանքի մաս կազմող ո՛ր ատրիբուտն են համարում ամենակարևորը:

Հարցման արդյուքները ապշեցրել են փորձագետներին. հայտնում է CitiFM Online-ը: Պարզվում է՝ բրիտանացիների համար շատ ավելի սարսափելի է ինտերնետի անջատումը, քան մի քանի շաբաթ սեքսից զրկվելը: Կանոնավոր ինտերնետ ունենալը հարցվածներից 42%-ի համար շատ ավելի կարևոր է, քան կայուն ինտիմ կյանքը: Ավելին, հարցված բրիտանացիների կեսից ավելին ինտերնետը համարում է շատ ավելի կարևոր անհրաժեշտություն, քան ուտելիքն ու սեփական բնակարան ունենալը:

Փորձագետները հարցումները անց են կացրել Անգլիայի և Հյուսիսային Իռլանդիայի 18-55 տարեկան 3 հազար բնակիչների շրջանում:

Հետաքրքիր է, որ հարցվածների 51%-ը կարծում է, որ ինտերնետը բարելավել է իրենց սոցիալական կապերը։ Եվս 25%-ի համար ինտերնետը միջոց է, որի շնորհիվ իրենք կապ են պահպանում մարդկանց հետ, ովքեր առանց ինտերնետի կորած էին համարվում, իսկ 7%-ն էլ պնդում է, որ ինտերնետը օգնել է իրենց կարգավորել ինտիմ կյանքը:

Բրիտանացիների 82%-ը խոստովանում է, որ նյարդային և գրգռվող է դառնում, եթե անջատում են իրենց ինտերնետը: