Մխիթարյանի տեղափոխությունը «Լիվերպուլ» վտանգի տակ է

Հայաստանի ազգային հավաքականի և Դոնեցկի «Շախտյորի» կիսապաշտպան Հենրիկ Մխիթարյանի տեղափոխությունը «Լիվերպուլ» վտանգի տակ է. տեղեկացնում է  Mirror-ը:

Ավելի վաղ տեղեկություն տարածվեց, որ կիսապաշտպանը մեկնում է Անգլիա բուժզննում անցնելու նպատակով: Սակայն ակումբների միջև  բանակցությունների վրա ազդում է այն փաստը, որ ֆուտբոլիստի նկատմամբ տրանսֆերային իրավունքների միայն մի մասն է պատկանում «Շախտյորին», իսկ  մնացած մասը պատկանում է  բիզնես խմբերից մեկին, որի անունը չի հայտարարվում:

Արդյունքում կարող են փոխվել գործարքի ինչպես պայմանները, այնպես էլ նրա ձևակերպման ժամկետները:

Հիշեցնենք, որ ավելի վաղ հայտարարվեց, թե  մերսիսայդցիները Մխիթարյանի տրանսֆերի համար պատրաստ են վճարել 22 մլն ֆունտ:

Ավելի վաղ «Շախտյորի» գործադիր տնօրենը՝ Սերգեյ Պալկինը հայտարարել էր, որ Հենրիկ Մխիթարյանը «Շախտյորին» կմիանա հունիսի 23-ին: