Նախարարը՝ սառնարանում (տեսանյութ)

ՀՀ գյուղատնտեսության նախարար Սերգո Կարապետյանն այսօր այցելեց գյուղմթերք ընդունող «Սպայկա» ընկերություն՝ ծանոթանալու ծիրանի մթերման գործընթացին։ 

Նախարարը եղավ ընկերության սառնարաններում, ուսումնասիրեց ծիրանի որակը, սառնարանային պայմանները, և հենց սառնարանի մեջ խոսելով լրագրողների հետ՝ ասաց.

«Այս տարի մենք մթերել ենք 4500 տոննա ծիրան՝ ամբողջ հանրապետությունից, հիմնականում՝ Արարատի մարզից, որովհետև ծիրանն այնտեղ է առաջինը հասունանում։ Ծիրանի մթերման գործընթացը դեռևս մեկուկես ամիս շարունակվելու է, և հույսով ենք, որ անցած տարվա թվերը կգերազանցի։ Անցյալ տարի այս օրը մենք ընդհանուր արտահանել էինք 1200 տոննա ծիրան, իսկ հիմա՝ 4500 տոննա», -ասաց նախարարը:

Կարապետյանի խոսքով՝ անցյալ տարվա հետ համեմատած՝ նույն գներն են, տարբերություն չկա, իսկ գյուղացիները գոհ են։

«Սպայկա» ընկերության գլխավոր տնօրեն Դավիթ Ղազարյանը լրագրողների հետ ճեպազրույցում ասաց, որ ընկերության վերազինումը կավարտվի մոտ 15 օրից։ 

«40 ժամ աշխատել ենք բոլորս միասին, մեկ ամսվա ընթացքում մեկնարկել սառնարան, հեշտ չէ, բայց մենք դա արեցինք»,- պատմեց գլխավոր տնօրենը:

Հարցին, թե պետությունը որևէ աջակցություն ցուցաբերել է վերազինման գործընթացում, ասաց՝ ոչ, իսկ ինչ վերաբերում է սառնարանային տնտեսություններին, արդյոք դրանք բավարարում են, ասաց. «Մեզ խաղողի ժամանակ պետք կգա, հնարավոր է՝ տարբեր տեղեր սառնանարաններ վարձակալենք, որովհետև հնարավոր է մեր հզորությունը մեզ չբավարարի»։

Վերջինս հայտնեց, որ «Սպայկա»-ի հին շենքը 4-րդ կարգի վթարային է, և այն պետք է քանդվի, այդ պատճառով ընկերությունը տեղափոխվել է նոր տարածք: