Վարդան Մինասյանը ոչ միայն հիանալի մարզիչ է, այլև` հիանալի մարդ. Յուրա Մովսիսյան

Հայաստանի ազգային հավաքականի և Մոսկվայի «Սպարտակի» հարձակվող Յուրա Մովսիսյանը gazeta.ru-ին տված հարցազրույցում անդրադարձել է ազգային հավաքականին.

«Յուրահատուկ զգացում է, երբ աչքի ես ընկնում հավաքականի կազմում, առավել ևս` երկու անգամ: Կոպենհագենում գոլ խփելը հեշտ չէ, և ես ուրախ եմ, որ դա մեզ հաջողվեց: Առաջին գոլիս ժամանակ Օզբիլիսը հիանալի աշխատանք կատարեց:

Մալթայի հետ խաղում անսպասելի հաշիվ գրանցվեց: Պատճառը, այնուամենայնիվ, մրցակցին թերագնահատելն էր: Մարզչի հետ քննարկել ենք այդ խաղը: Կարող եմ ասել, որ հավաքականում միայն դրականն եմ տեսնում: Ես գոհ եմ մեր մարզչի հետ աշխատանքից և նրան համարում եմ ոչ միայն հիանալի մասնագետ, այլև` հիանալի մարդ: Յուրաքանչյուր մարդ, ով գոնե մի քիչ տեղյակ է ֆուտբոլից, հասկանում է, որ Մինասյանը իզուր չի աշխատում ի փառս Հայաստանի: Հայաստանի հավաքականին փայլուն ապագա է սպասվում: Մենք հետզհետե առաջընթաց ենք ապրում և աշխատում ենք մեզ վրա: Այս տարին բավականին բարդ ստացվեց հավաքականի համար՝ վնասվածքների և որակազրկումների պատճառով: Այնպես որ, կարծում եմ` պետք է շարունակենք բարելավել մեր ֆուտբոլը, և համոզված եմ` արդյունքում ամեն ինչ լավ կլինի»,-նշել է Մովսիսյանը: