Պարզվել է վթարի ենթարկված վարորդի և 3 վիրավորների ինքնությունը (լուսանկարներ)

Ոստիկանության քննչական գլխավոր վարչության Գեղարքունիքի մարզի քննչական բաժնում նյութեր են նախապատրաստվում երեկ՝ հունիսի 22-ին, Մարտունի-Վարդենիս ավտոճանապարհի 35-րդ կմ հատվածում տեղի ունեցած ավտովթարի փաստով:

Ինչպես ավելի վաղ հայտնել էր shamshyan.com-ը, ժամը 19:00-ի սահմաներում Toyota Land Cruiser մակնիշի 30 ԼՍ 488 համարանիշի ավտոմեքենայի վարորդը նշված ճանապարհահատվածում դուրս էր եկել ճանապարհի երթևեկելի գոտուց դեպի ձախ, բախվել երկաթե արգլապատնեշներին և շրջվել:

Վթարի հետևանքով վարորդը և 3 ուղևորներ տեղափոխվել էին Վարդենիսի կայազորային զինվորական հոսպիտալ: Ոստիկանության Վարդենիսի բաժնի օպերատիվ խումբը քրեական հետախուզության բաժանմունքի պետ Մհեր Մինասյանի գլխավորությամբ պարզել է, որ վարորդը հանդիսանում է Վարդենիս քաղաքի բնակիչ, 31-ամյա Սևակ Մանուկյանը, ով տեղափոխվել է հոսպիտալ և ուղևորներ՝ Վաղարշապատ քաղաքի բնակիչ, 24-ամյա Վիկտորյա Ավետիսյանը, և Վարդենիս քաղաքի բնակիչներ, 62-ամյա Վերգուշ Մանուկյանը և 4-ամյա Սամվել Մանուկյանը:

Վթարի վայր էին ժամանել ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ վաշտի հրամանատար Սերգեյ Հակոբյանի գլխավորությամբ: Տեղում աշխատել է նաև ՀՀ Արտակարգ իրավիճակների նախարարության փրկարար ծառայության Գեղարքունիքի մարզի փրկարարական վարչության Վարդենիս թիվ 35 հրշեջ-փրկարարական ջոկատը՝ ջոկատի հրամանատար Մնացական Փոստոյանի գլխավորությամբ՝ մեկ մարտական հաշվարկով: