Կանցկացվի Հայաստանի KBH-ի դպրոցական լիգայի ամառային գավաթի խաղարկությունը

Հուլիսի 1-3-ը ՀԵՀ Ծաղկաձորի երիտասարդական կենտրոնում կանցկացվի Հայաստանի KBH-ի դպրոցական լիգայի ամառային գավաթի խաղարկությունը (ամառային ճամբարային հավաք):

Այն կազմակերպել են Հայաստանի երիտասարդական հիմնադրամը, «Հայաստանի KBH-ի դպրոցական լիգան», «Ագապե» պրոդյուսերական կենտրոնը:

Ծրագրին կմասնակցեն Երևան քաղաքի շուրջ 10 դպրոցների ավարտական դասարանի` 15-18 տարիքային խմբի աշակերտներ, որոնք վարում են աշխույժ, սպորտային ապրելակերպ, հետաքրքրվում են մշակույթով և հասարակական գործունեությամբ:

Ծրագրի նպատակն է Հայաստանի դպրոցների ավարտական դասարանների աշակերտների մեջ ոգևորություն առաջացնել KBH խաղի նկատմամբ, զարգացնել հումորայի ներուժ, սերմանել նոր արժեքներ, կազմակերպել ճամբարային ակտիվ սպորտային հանգիստ ու ժամանց: Ծրագրի իրականացմամբ Հայաստանում կբարձրացվի դպրոցական, հետագայում նաև ուսանողական KBH-ի լիգայի մակարդակը, կստեղծվեն ուսումնական հաստատությունների միջև նոր կապեր:

Եռօրյա ճամբարային հավաքի ընթացքում կանցկացվեն վոլեյբոլի, ֆուտբոլի, սեղանի թենիսի, շախմատի, ինտելեկտուալ խաղ-մրցույթներ, կկազմակերպվի այցելություն լողավազան, Team Building, КВН-գավաթի խաղարկություն: Ճամբարի մասնակիցները կմրցեն 6 ջոկատներով:

Ինտելեկտուալ խաղ մրցույթին կհնչեն ՀՀ հանրակրթական համակարգում ներգրավված հայ գրականություն, հայոց պատմություն, մաթեմատիկա, աշխարհագրություն, տրամաբանություն առարկաներից հարցեր, որոնց ճիշտ պատասխանելու դեպքում ջոկատները կվաստակեն միավորներ, և կորոշվի հաղթողը: Team Building-ը թիմ ձևավորող խաղ է, որի մշակույթը Հայաստանում նոր է ձևավորվում: Team Building-ի հիմնական առանձնահատկությունը միավորման խնդիրն է, ջոկատում դրական մթնոլորտի ձևավորումը, միասին աշխատելու ցանկության առաջացումը: Խաղն անցկացվելու է 2 փուլով' «Ողջույն» և «Բիատլոն»: Այն կգնահատվի КВН-ի դասական եղանակով' նախապես ընտրված ժյուրիի օգնությամբ: Գնահատման չափորոշիչներն են հումորի որակը, ինքնատիպությունը, ստեղծագործական մոտեցումը, թեմայի արդիականությունը, դերասանական մատուցումը: