Հունիսի 25-ին մահացել է Տիգրան Լևոնյանը (տեսանյութեր)

Հայ օպերային երգիչ (դրամատիկական տենոր), օպերային ռեժիսոր, կինոռեժիսոր, դերասան Տիգրան Լևոնյանը (Խանդիկյան) ծնվել է 1936 թ. դեկտեմբերի 14-ին, Բեյրութում:

1946թ. նա ծնողների հետ հայրենադարձվել է Հայաստան։

1958-ին ավարտել է Երևանի թատերական ինստիտուտը։ 1977-ին ավարտել է Մոսկվայի թատերարվեստի ինստիտուտի օպերային ռեժիսուրայի բաժինը։ Երգեցողական արվեստն ուսանել է ապագա կնոջ` Գոհար Գասպարյանի մոտ։ Ստաժավորվել է Միլանի հռչակավոր «Լա Սկալա» թատրոնում։ 1962-ից` Երևանի օպերայի և բալետի ազգային ակադեմիական թատրոնի մեներգիչ։ 1970-77թթ. միաժամանակ` ռեժիսոր, 1977-ից` գլխավոր ռեժիսոր, 1991-99-ին նաև գեղարվեստական ղեկավար։ Եղել է Երևանի պետական կոնսերվատորիայի պրոֆեսոր:

Նա բազմաթիվ դերեր է կերտել. Սարո (Ա. Տիգրանյանի «Անուշ»), Տիրիթ (Տ. Չուխաճյանի «Անուշ»), Մանրիկո (Ջ. Վերդիի «Տրուբադուր»), Օթելլո (Ջ. Վերդիի «Օթելլո») և այլն:

Որպես արտիստ նա օժտված էր ոչ միայն հոգեթով ձայնով, այլեւ դրամատիկ դերասանի, կերպարային ժանրի մեկնաբանի վառ ձիրքով: Եվ այդ սքանչելի համադրությունը բեմում կերտում էր անմոռանալի կերպարներ. հին եւ ծանոթ, բայց միշտ նոր ու գեղարվեստական անակնկալներով գրավիչ: Բացառիկ երեւույթ, որը մշտապես արձագանքում էր Տիգրան Լեւոնյանի թե՛ գործընկերների, թե՛ հանդիսատեսի սրտերում:

Նա իր ժամանակի օպերային հարուստ բեմարվեստի կրողն էր: Դա են վկայում Տիգրան Լեւոնյանի «Լեբլեբիջի», «Անուշ», «Արշակ Բ», «Պողիկտոս», «Օթելլո», «Պայացներ» օպերային գանձերի բեմադրությունները: Դա է հաստատում նրա՝ դրամատիկ տենորի մարմնավորած օպերային հերոսների պատկերասրահը:

Մահացել է 2004 թ. հունիսի 25-ին, Երևանում: