Նախաքննությունը կպարզի՝ իմ, թե նախորդի օրոք է կատարվել

Ֆինանսների նախարարության վերահսկողության տեսչության մարզային ստուգումների արդյունքները թեեւ չեն թմբկահարվում այնպես, ինչպես մյուս մարմիններինը, սակայն դա դեռ չի նշանակում, որ մարզպետներն ու համայնքների ղեկավարները տագնապած չեն:

Նրանք խուճապահար փորձում են պատասխանատվությունից խուսափելու ելքեր կամ այդ պատասխանատվությունն ուրիշների վրա բարդելու ձեւեր գտնել: Իսկ ֆիննախի ստուգումների արդյունքում 5 մարզում բացահայտվել են պաշտոնեական դիրքի չարաշահման, դիզվառելքի յուրացման դեպքեր, եւ այդ փաստերով Հատուկ քննչական ծառայությունում հարուցվել են քրեական գործեր: Այդ մարզերի թվում է նաեւ Գեղարքունիքի մարզը, որի մարզպետ անցած տարի նշանակվեց ՀՀԿ-ական Ռաֆիկ Գրիգորյանը:

«Հրապարակ»-ի հետ զրույցում նա ասաց.

-Ճիշտն ասած, ես տեղեկացել եմ կայքերից ու ուզում եմ ասել, որ ուսումնասիրությունները ոչ թե մարզպետարաններում են տեղի ունեցել, այլ՝ մարզերում: Ֆիննախի ԿՌՈւ-ն ուսումնասիրություններ է կատարել, հանդիպումներ ունեցել բնակիչների հետ, եւ ավարտելուց հետո այդ գործերն ուղարկել են Հատուկ քննչական ծառայություն ու մեզ խոստացել են ուղարկել ուսումնասիրությունների արձանագրությունը եւ դեռ չեն ուղարկել: Այսինքն՝ ես դեռ տեղեկություն չունեմ:

Կարծում եմ՝ ճիշտ չի էսօր մարդկանց ժամանակների մասին խոսել, ես նման հայտարարություն կարդացի լրատվամիջոցներում, որ նախկինն ասել է, թե իր ժամանակ չի եղել, կարծում եմ՝ կոռեկտ չէ, որ խոսվի, թե ում ժամանակ է կատարվել, նախաքննությունը ցույց կտա, թե ում օրոք են եղել:

Առավել մանրամասն' «Հրապարակ»-ի այսօրվա համարում