111 տարի առաջ այս օրն է ծնվել կոմպոզիտոր Արտեմի Այվազյանը (տեսանյութեր)

Հայ կոմպոզիտոր, խմբավար, թավջութակահար, ՀԽՍՀ ժողովրդական արտիստ Արտեմի Այվազյանը ծնվել է 1902թ. հունիսի 26 – ին, Բաքվում:

Երաժշտական տարրական կրթությունն ստացել է Բաքվի ուսումնարանում, ապա սովորել է Թիֆլիսի կոնսերվատորիայում, ավարտել է 1922-ին։ Հաջորդ տարի եկել է Երևան և որպես ուսուցիչ պաշտոնավարել Երևանի կոնսերվատորիայում: 1927-30-ին աշխատել է Լենինականի երաժշտական ստուդիայում որպես դիրեկտոր։ 1930-ին մեկնել է Մոսկվա, շարունակել ուսումը Մոսկվայի կոնսերվատորիայում որպես թավջութակահար, ապա Բարձրագույն վարպետության դպրոցում, ավարտել 1935-ին:

Վերադառնալով Հայաստան, նվիրվել է ստեղծագործական աշխատանքի։ Նրա առաջին ծավալուն երկը «Թափառնիկոս» օպերետն է (1937) գրված ըստ Հակոբ Պարոնյանի «Ատամնաբույժն արևելյան» կատակերգության:

Այվազյանի «Թափառնիկոս», «Պարոն Մինթոևը Փարիզում» կոմիկական օպերաները բեմադրվել են Երևանի օպերայի և բալետի թատրոնում, իսկ «Ատամնաբույժն արևելյան», «Աշուղ Մուրադ», «Երջանիկ օր», «Սեր աստղերի տակ» օպերետները՝ երաժշտական կոմեդիայի թատրոնում: Այվազյանը հեղինակ է նաև մի շարք սիմֆոնիկ ստեղծագործությունների՝ սյուիտների, կոնցերտների, 2 կվարտետի և այլն: Գրել է կինոերաժշտություն «Ձյունե թագուհին» (1957թ., Վենետիկի կինոփառատոնի 1-ին մրցանակ), «Մոր սիրտը» (1957 թ.), «Ինչու՞ է աղմկում գետը» (1958 թ., երկուսն էլ՝ գեղարվեստական), «Պոեմ Հայաստանի մասին» (1960 թ., վավերաֆիլմ) և այլ կինոնկարների համար:

Մահացել է 1975թ. նոյեմբերի 14-ին Երևանում: