Թբիլիսիում կոկորդիլոսը պատռել է վրացական էկզոտարիումի տնօրենի տաբատը

Վրաստանի մայրաքաղաք Թբիլիսիի կենդանաբանական այգում ապրող Նելսոն անունով կոկորդիլոսը հարձակվել է էկզոտարիումի տնօրենի վրա, կծել նրա ոտքը և պատռել տաբատը: Միջադեպը տեղի է ունեցել այսօր առավոտյան, երբ Նելսոնին ակվարիումի միջից փորձել են տեղափոխել բացօթյա վանդակ. գրում է Newsgeorgia-ն:

Տնօրենի խոսքերով` տեղի ունեցածից հետո նրան բժշկական օգնություն է պետք եղել, սակայն այժմ նա իրեն լավ է զգում:

«Ոչինչ, ես նոր անդրավարտիք կգնեմ, նման բաներ պատահում են, երբ գիշատիչ կենդանիների հետ ես աշխատում»,-ասել է նա և հավելել, որ չնայած միջադեպին` ինքը շարունակում է լավ վերաբերվել իր խնամքի տակ գտնվող բոլոր կենդանիներին: