Ստամբուլահայ երգչուհի Սիպիլը տպավորված է Հայաստանով (տեսանյութ)

Վերջերս Հայաստանում էր ստամբուլահայ երգչուհի Սիպիլը: Դեռևս 2012 թվականի սեպտեմբերին երգչուհին Երևանում կազմակերպել էր իր «Սիպիլ» ձայնասկավառակի բարեգործական վաճառքը՝ նպատակ ունենալով հասույթը տրամադրել Երևանի մանկապարտեզներից մեկին։

Կրկին Հայաստան գալու հիմնական նպատակը ձայնասկավառակից ստացված հասույթը Նորքի 101 մանկապարտեզին անձամբ հանձնելն էր:

Lurer.com-ի թղթակցի հետ զրույցում երգչուհին պատմեց Հայաստանում անցկացրած իր օրերի մասին.

«Ամեն անգամ, երբ Հայաստան եմ այցելում, շատ լավ ու երջանիկ տպավորություններով եմ վերադառնում: 6-րդ անգամ էի այցելում Հայաստան: Շատ ուրախ եմ, որ այդպիսի պատիվ է ինձ շնորհվել: Շատ մեծ հուզմունքով այցելեցի մանկապարտեզ` տեսնելու մեր հրաշալի երեխաներին. նրանք շատ լավ էին պատրաստված, երգեցին, պարեցին, արտասանեցին: Մի խոսքով` ես շատ ուրախացա:

10 օր անցկացրի Երևանում և հնարավորություն ունեցա հանդիպելու իմ բարեկամներին, նրանց հետ հաճելի ժամանց անցկացրի:

«Ամեն անգամ, երբ այցելում եմ, նոր ծանոթություններ եմ ունենում: Շատմեծ հաճույքով ծանոթացա Շուշան Պետրոսյանի, Հրաչ Քեշիշյանի, Հենրիկ Անասյանի, Սերգեյ Սմբատյանի, Նազենի Հովհաննիսյանի, Սոֆի Մխեյանի, Գևորգ Հակոբյանի, Ալլա Լևոնյանի, Միքայել Պողոսյանի և Ջիվան Գասպարյանի, Հասմիկ Կարապետյանի, Գրիշա Աղախանյանի հետ: Նաև բախտ ունեցա ժամանակ անցկացնել իմ շատ լավ բարեկամ Անդրեի, Ինգա և Անուշ Արշակյանների և Արա Գևորգյանի հետ»:

Երգչուհու խոսքով` այս օրերին ինքը շատ զբաղված է, բազմաթիվ ծրագրեր կան, որ անպայման պետք է ավարտին հասցնի, բայց դեռևս չի ցանկանում խոսել դրանց մասին, խոստանում է ավարտից հետո բոլորին ներկայացնել իր աշխատանքի արդյունքը:

Սիպիլը նաև ասաց, որ սիրով կայցելի Հայաստան` թե՛ պարզապես այցելության, թե՛ համերգային ծրագրերով: