Իրավիճակը վերահսկելի է. Սեյրան Օհանյան

«Սա բիզնես է, շուկա», հենց այսպես Երեւանում մեկնարկած քաղաքական ռազմավարական երկրորդՙ «ՀԱՊԿ-ի ռազմական բաղադրիչի ձեւավորման քաղաքական-անվտանգային ուղենիշները» համաժողովի ժամանակ կարծիք հայտնեց ՀԱՊԿ գլխավոր քարտուղար Նիկոլայ Բորդյուժան: Հիշեցնենք, որ ըստ լրատվամիջոցներում հայտնված տեղեկությանՙ գարնանը Ադրբեջան է մատակարարվել ռուսական ցամաքային ռազմատեխնիկա: Գործարքի ընդհանուր գումարը գնահատվում է 1 մլրդ դոլար: Այս առնչությամբ Բորդյուժան հիշեցրեց, որ Ռուսաստանը զենքի խոշորագույն արտադրողներից եւ մատակարարներից է: «Ռուսաստանը զենք է մատակարարում աշխարհի տասնյակ երկրների, այդ թվում' այն երկրներին, որոնք չեն մտնում ՀԱՊԿ կազմի մեջ: Կրկնում եմ, սա բիզնես է եւ Ռուսաստանի տնտեսությունն է: Հարցն այլ է, երբ ոչ ՀԱՊԿ անդամ երկրներին զենք վաճառելիս որոշումը կայացնելու ժամանակ առաջնորդվում են հավասարությունը պահպանելու սկզբունքով: Դա սկզբունք է, որն ուշադրության կենտրոնում է եղել ձեր հարեւանին զենք վաճառելու որոշում կայացնելու ժամանակ», ասաց ՀԱՊԿ գլխավոր քարտուղարը: Այս մասին գրում է «Ազգ» օրաթերթը:

ՀՀ պաշտպանության նախարար Սեյրան Օհանյանի խոսքերովՙ Ադրբեջանի սպառազինմամբ չմտահոգվել չենք կարող, սակայն ռազմատեխնիկական հարաբերությունները ռազմավարական դաշնակից Ռուսաստանի հետ բարձր մակարդակի վրա են: «Այսօր մենք անում ենք ամեն ինչ, որ ուժերի հավասարակշռությունը կարողանանք պահպանել' ոչ միայն քանակական, այլեւ որակական առումով:

Այս թափանցիկությունը բերում է նրան, որ յուրաքանչյուր մատակարարում, հավասարակշռության խախտում վերահսկվի ռազմավարական գործընկերոջ համար, որը որոշակի պարտադրանքի տակ է դնում տարածաշրջանային երկրներին, որպեսզի այդ միջոցները չօգտագործվեն: Ուզում եմ ասել, որ ՌԴ-ի հետ գտնվում ենք սերտ հարաբերությունների մեջ' ռազմատեխնիկական զարգացման ուղղությամբ: Երեկ մի շատ կարեւոր փաստաթուղթ ստորագրեցինք, որը հնարավորություն է տալու, որ մեր ռազմական հարաբերությունները միջպետական ավելի բարձր մակարդակի վրա դրվեն' հնարավորություն տալով մեր եւ Ռուսաստանի ռազմական արդյունաբերության ձեռնարկություններին կնքելու անմիջական պայմանագրեր: Այնպես որ, իրավիճակը վերահսկելի է, իսկ ինչ վերաբերում է սպառազինության մրցավազքին, ապա բազմիցս խոսել ենք այն մասին, որ Ադրբեջանի ղեկավարությունը փորձում է իր քայլերով մեզ ներքաշել սրա մեջ, բայց մենք կուրորեն չենք հետեւում մրցավազքին, այլ շեշտը դնում ենք որակի վրա», ասաց նախարար Օհանյանը: Նախարարը նկատի ունի երկու օր առաջ ՀՀ մի շարք գերատեսչությունների ղեկավարների եւ ՌԴ ԱԱԽ քարտուղար Նիկոլայ Պատրուշեւի գլխավորած պատվիրակության անդամների միջեւ անվտանգության ոլորտում ստորագրված հինգ պայմանագրերն ու համաձայնագրերը: Պատրուշեւի բնորոշմամբ հայ-ռուսական հարաբերությունները առաջին հերթին ամենաբարձր մակարդակի վրա գտնվող ռազմավարական հարաբերություններ են: Հայ-ռուսական ռազմատեխնիկական համագործակցության համատեքստում անդրադառնալով նաեւ ռուսական զենքի վաճառքին Ադրբեջանին, Պատրուշեւն ասաց, որ զենք վաճառելիս Ռուսաստանը պահպանել է բոլոր միջազգային պարտավորություններն ու պահանջները:

Առավել մանրամասը` «Ազգ»-ի այսօրվա համարում