Հայ ուսանողի պատրաստած տեսաֆիլմը ցնցել է Լոնդոնի Համալասարանական քոլեջը (տեսանյութ)

Մոտենում է Հայոց ցեղասպանության հարյուրամյա տարելիցը, սակայն աշխարհը ոչ միայն չի ճանաչել ու դատապարտել այն որպես դարի առաջին եղեռնագործություն, այլև չգիտի այդ մասին: Միլիոնավոր մադրիկ անհաղորդ են մեր հարյուրամյա վշտին: Գուցե մե՞րն է մեղավորությունը, որ հրեաների Հոլոքոստը միջազգային ճանաչում ունի, իսկ Հայոց ցեղասպանությունը՝ ոչ:

Երբ Հայաստանի սահմաններից դուրս ես գալիս, հասկանում ես, որ դու ապրում ես մի փոքրիկ երկրում, որի մասին շատերն անգամ չեն էլ լսել: Յուրաքանչյուր հայ ակամա փորձում է ըստ արժանվույն ներկայացնել իր ազգին՝ տպավորելու զրուցակցին: Նույն իրավիճակում են հայտնվում նաև արտերկրում սովորող հայ ուսանողները:

Լոնդոնի Համալասարանական քոլեջում (UCL) սովորող Աշոտ Մարգարյանն իր օտարազգի ընկերներին հայոց պատմության մասին երկար դասեր պատմելու փոխարեն որոշեց նրանց իսկ մասնակցությամբ տեսաֆիլմով ներկայացնել մեր պատմության ամենաողբերգական էջերից մեկը:

«Լոնդոնի համալսարանական քոլեջը միջազգային լավագույն համալսարաններից է, որտեղ ուսանելու են գալիս աշխարհի տարբեր անկյուններից: Ամեն անգամ մեծ ցավ էի ապրում, որ շատերը չգիտեին Հայոց ցեղասպանության մասին, չգիտեին, որ այն ավելի շուտ է տեղի ունեցել, քան հրեաների Հոլոքոստը: Այդ ամենի արդյունքում գաղափար հղացավ պատրաստել փոքրիկ տեսաֆիլմ, որտեղ ներկայացվում է ոչ միայն Հայոց ցեղասպանոթյունն, այլև՝ դրա անպատժելիության հետևանքներն ամբողջ մարդկության հետագա ճակատագրի վրա»,- Lurer.com-ի թղթակցի հետ զրույցում նշեց Ա. Մարգարյանը:

Տեսաֆիլմում, որն ունի «Never again» անվանումը, ներկայացվում են կադրեր ոչ միայն Հայոց ցեղասպանությունից, այլև՝ 21-րդ դարի առաջին ողբերգությունը չպատժելու հետևանքով առաջացած այլ ցեղասպանություններից: Ֆիլմի վերջում UCL-ի տարբեր ազգերի ներկայացուցիչ ուսանողներն իրենց լեզուներով դատապարտում են ցեղասպանությունը: