Ինձ համար միշտ ուրախություն է Հայաստան գալը. Սևակ Մխիթարյանը՝ իր կյանքի և կարիերայի մասին (լուսանկարներ)

Ինչպես արդեն Լուրեր.com-ը տեղեկացրել էր, Բուլղարիայի Վառնա քաղաքում ավարտվել է հերթական շախմատային խոշոր մրցաշարը, որի միանձնյա հաղթողը դարձավ բրազիլահայ գրոսմայստեր Գրիգոր-Սևակ Մխիթարյանը։ 9 խաղում վաստակելով 7.5 միավոր՝ Սևակը դարձավ առաջինը 89 մասնակցի շարքում։

Լուրեր.com-ը փորձեց մի փոքր ավելին իմանալ տաղանդաշատ բրազիլահայ գրոսմայստերի մասին և զրուցեց նրա հետ՝ պարզելու վերջինիս անցած ճանապարհը, ձեռբերումներն ու նախասիրությունները։

Շնորհավորելով Սևակին հերթական ձեռքբերման առթիվ՝ խնդրեցինք նրան նախ մի փոքր պատմել իր մասին.

- Կպատմե՞ք Ձեր մասին։ Երբվանի՞ց եք ապրում Բրազիլիայում։ Այնտե՞ղ եք ծնվել ու մեծացել։

- Այո՛, Բրազիլիայում եմ ծնվել։ Հայրիկս 75-ին թվին է եկել Բրազիլիա Լիբանանից. մայրս էլ է հայ, բայց Բրազիլիայում ծնված հայ։

- Քանի որ խոսեցիք Ձեր ծնողների մասին, հետաքրքիր է՝ Ձեր ծնողները ազդեցություն ունեցե՞լ են ձեր մասնագիտական ընտրության վրա։ Քանի՞ տարեկանում եք սկսել շախմատ խաղալ։

- Անպայմա՛ն. միշտ ծնողներս են քաջալերել, որ շախմատով զբաղվեմ, հայրս ինձ օգնեց կատարել առաջին քայլերը, երբ 6 տարեկան էի։

- Ո՞րն էր Ձեր առաջին լուրջ շախմատային հաղթանակը։

- Առաջին հաղթանակս եղավ այն, երբ դարձա Սան Պաուլուի` մինչև 14 տարեկանների չեմպիոն՝ դա 1999 թվականին էր կամ 2000, այնքան շատ ժամանակ է անցել, որ ստույգ տարեթիվը չեմ հիշում։

Հետո 2 անգամ դարձա մինչև 20 տարեկանների Բրազիլիայի չեմպիոն՝ 2003 և 2004 թվականներին, 2006-ին դարձա միջազգային վարպետ, իսկ 2010-ին՝ գրոսմայստեր։

- Եղե՞լ եք Հայաստանում. և եթե եղել եք, կասե՞ք՝ երբ։

- Երեք անգամ եղել եմ Հայաստանում՝ 1999-ին՝ համահայկական խաղերի առթիվ, 2000 թվականին՝ շախմատ պարապելու համար, և 2010-ին՝ Շախմատի օլիմպիադային մասնակցելու համար։

- Կպատմե՞ք Ձեր ստացած տպավորությունների մասին։

- Առաջին անգամ երբ եկա Հայաստան, շատ ուրախ էի ճանաչել մեր հայրենիքը և տեսնել այն ամենը, ինչ մանկուց էի երազում տեսնել։ Շախմատը ինձ հնարավորություն է տվել ճամփորդել 20 երկրում, բայց առաջին անգամ Հայաստան գալը ամենատպավորիչն էր։

- Հայաստանը շատ է փոխվել։ Ե՞րբ կգաք Հայաստան հաջորդ անգամ։

- Փոփոխություններ նկատեցի դեռևս 2010 թվին, Երևանում շատ բան էր փոխվել, սիրուն շինություններ էին ավելացել։ Ինձ համար մեծ ուրախություն է կրկին Հայաստան գալը։

- Կապ կա՞ Ձեր և Հայաստանում ապրող գրոսմայստերների միջև։

- Այո՛, միշտ կապ եմ պահում Լևոնի հետ, մյուս խաղացողների հետ՝ նույնպես։

- Կպատմե՞ք Ձեր նախասիրություննների մասին։ Ինչո՞վ եք զբաղվում ազատ ժամանակ։

- Շատ եմ սիրում հեռուստասերիալներ դիտել, երբեմն՝ ֆուտբոլ եմ խաղում ընկերներիս հետ։

Դե ինչ, Սևակին մաղթենք նորանոր հաջողություններ իր հետագա կարիերայում։

Զրուցեց Աննա Թումասյանը