Նարինե Սուլթանյան. «Կար ժամանակ, որ ես հիվանդագին էի ընդունում բամբասանքները» (ֆոտո)

«Արմենիա» հեռուստատեսության էկրանից մեզ իր գեղեցկությամբ շլացնում է հաղորդավարուհի Նարինե Սուլթանյանը: ArmStar.am-ը ևս անտարբեր չմնաց սևահեր գեղեցկուհու նկատմամբ և իրեն չզրկեց հաղորդավարուհու հետ զրուցելու հաճույքից: Նարինեն էկրանից այն կողմ կշռադատված, հավասարակշռված, իր անսելիքն ու անելիքն իմացող կնոջ տպավորություն է թողնում: ArmStar.am-ը փորձեց հաղորդավարուհուց պարզել, թե արդյոք այդ կարծիքը համապատասխանում է իրականությանը. «Այնպիսին, ինչպիսին երևում եմ էկրանից, իրական կյանքում այդ հատկանիշներից շատերը համընկնում են: Իրականում ես հավասարակշռված եմ: Իհարկե, ինձ բնութագրել չեմ սիրում, թողնում եմ, որ մտերիմներս բնութագրեն, բայց պետք է նշեմ, որ հանգիստ եմ, հավասարակշռված ու ադեկվատ, ես միանգամից չեմ բռնկվում»:

ArmStar.am-ի մոտ հարց առաջացավ, թե ինչը կարող է բարկացնել կամ հունից հանել Նարինե Սուլթանյանին. «Մարդկանց մեջ չեմ սիրում կեղծիքը: Գերադասում եմ, որ մարդը բարձրաձայնի շատ բաների մասին, քան կեղծի: Ես կընդունեմ մարդուն իր թերություններով հանդերձ, բայց չեմ ընդունի, եթե նա կեղծի իր այսպիսին կամ այնպիսին լինելը: Առհասարակ հեռուստաէկրանից մարդիկ փորձում են ավելի գեղեցիկ, ավելի լավը երևալ, ես չունեմ նման խնդիր, ես այնպիսին եմ, ինչպիսին որ կամ՝ իմ բոլոր թերություններով ու առավելություններով»:

Նարինեի հետ զրույցի ժամանակ անդրադարձանք նաև նրա աշխատանքին. «Ես շատ սիրում եմ իմ աշխատանքը: Ինձ համար աշխատանքը մի գործընթաց է, որի ժամանակ արդյունքի ես հասնում: Որ օրը ես գնում եմ նկարահանման, այդ օրը առավոտվանից հաճույք եմ ստանում' սկսած իմ վարսահարդարումից, տեսախցիկի հետ աշխատանքից: Սիրում եմ աշխատանքի ամեն ինչը»,-նշեց Նարինեն:

Նարինեն ոչ միայն նկարահանման օրերին է սիրում հարդարվել, այլև ամեն օր. «Այնպիսին, ինչպիսին հեռուստաէկրանին եմ՝ պճնված, միշտ սարքված, առօրյայում ես չեմ սիրում այդպիսին լինել: Անկախ նրանից ճանաչված եմ, թե ոչ, ես առաջին հերթին կին եմ, ով պետք է միշտ խնամված լինի: Պարտադիր չէ դիմահարդարում ունենալ խնամված կամ լավ տեսք ունենալու համար: Ես ինձ գոնե մեկ օր չեմ հիշում փնթի վիճակում կամ թեկուզ եղունգներս չխնամած' նույնիսկ երեխայիս ծնունդից հետո: Իհարկե նախկինում անգամ խանութ գնալիս էի դիմահարդարվում, հիմա, կարելի է ասել, ազատվել եմ այդ բարդույթներից»,-նշեց հաղորդավարուհին:

Նարինեն այն կանանցից է, ով մեծ հաջողություններ է գրանցել իր կյանքի ճանապարհին, ArmStar.am-ը հետաքրքրվեց, թե որն է Նարինեի հաջողության գրավականը. «Կարծում եմ իմ աշխատասիրությունը և այն, որ ես շատ եմ սիրում իմ աշխատանքը: Ես աշխատում եմ առաջնահերթ ինքս ինձ գոհացնել, եթե անում եմ գործս, պիտի դա անեմ լավ: Մեծ ցանկության դեպքում ցանկացած կին կարող է համատեղել կին, ծնող և աշխատող լինելու իր կարգավիճակները: Եթե ես առավոտյան նկարահանման եմ, ես գիշերն եմ անում իմ տնային գործերը: Ի դեպ որքան ես զբաղված եմ, այնքան ավելի շատ եմ ժամանակ տրամադրում իմ դստերը՝ նրա համար ընթերցում եմ, զրուցում և այլն»,-ծիծաղով նշեց հաղորդավարուհին:

Ի դեպ ArmStar.am-ը պարզեց նաև, որ Նարինեն շատ մեծահոգի է: Հիմա կասեք ինչպե՞ս: Երբ ArmStar.am-ը հարցրեց, թե ինչպես է առհասարակ Նարինեն վերաբերվում իր անձի շուրջ պտտվող բամբասանքներին, Նարինեն մեծահոգաբար պատասխանեց, որ բացարձակ անտարբեր է դրանց նկատմամբ. «Կար ժամանակ, որ ես շատ հիվանդագին էի ընդունում բամբասանքները: Եթե անկեղծ լինեմ, ես հիմա իմ մասին բամբասանքներ չեմ լսում: Պատճառներից մեկն էլ այն է, որ ես ֆիլտրել եմ իմ ծանոթներին, շփվում եմ բացառապես այն մարդկանց հետ, ում հետ ինձ հաճելի է: Իհարկե յուրաքանչյուր մարդ էլ իրեն վատ կզգա, եթե իր մասին վատ բաներ խոսեն, բայց հիմա ես ասում եմ. «Քավ լիցի, ինչ ուզում են թող խոսեն»»:

Թվում է, թե Նարինեն կարիերիստ է: Մեզ մոտ հարց առաջացավ, եթե իր կյանում երբևէ Նարինեն երկընտրանքի առջև կանգներ՝ ընտանիք, թե կարիերա, որի՞ց ավելի հեշտ կհրաժարվեր: Նարինեի պատասխանն այսպիսին էր. «Ես իրականում կարիերիստ չեմ, եթե ես այդպիսին լինեի ավելի շատ բանի հասած կլինեի: Յուրաքանչյուր կնոջ համա, կլինի նա հոլիվուդյան աստղ, թե մեկ այլ անձ, առաջնայինն իր անձնական կյանքն է: Միանշանակ կարող եմ ասել, որ ես այն մարդը չեմ, ում կարող են երկընտրանքի առաջ կանգնեցնել: Եթե իմ ամուսինը կամ որևէ մեկ այլ մարդ ցանկանա ինձ երկընտրանքի առջև դնել, նա պարզապես չի կարող լինել իմ կողքին»,- հաստատակամորեն պատասխանեց զրուցակիցս:

Զրուցեց Աշխեն Մնացականյանը