ԲՀԿ-ում վարչապետի պաշտոնանկության հարց չի քննարկվել

Կառավարությունն ըստ էության չի արդարացրել իր հետ կապված հույսերը, դրա մասին են վկայում նաեւ ԱԺ-ում կառավարության 2011-12 թթ. կատարողականին ԱԺ ոչ իշխանական ուժերի դեմ քվեարկությունը եւ ԱԺ ամբիոնից հնչած ելույթները: Ինչ են մտածում քաղաքական ուժերը եւ հատկապես երկրի բացառիկ այլընտրանք ԲՀԿ-ն, որը հատկապես վերջին 1,5 տարում իր քաղաքական կուրսի գերնպատակ էր հայտարարել վարչապետի փոփոխությունը եւ այդ նպատակով որեւէ ջանք չէր խնայում, իսկ վերջին շրջանում լռում է: Հատված ԲՀԿ անդամ Ստեփան Մարգարյանի հետ զրույցից:

Ընդհանուր առմամբ արդարացվա՞ծ եք համարում այս կառավարության գործունեությունը:

- Գիտեք ինչ, կառավարության գործունեության գնահատականը տվել ենք մեր քվեարկությամբ, հիմա նորից անդրադառնալ դրան, ես իմաստը չեմ տեսնում: Իսկ օֆշորների հետ կապված պատմության վերաբերյալ կրկնում եմ. եթե Տիգրան Սարգսյանն ասում է, որ ինքը խաբար չի, ուրեմն թող պարզեն: Ես կարծում եմ, որ դրա հաջորդ քայլն էլ պետք է արվեր, որովհետեւ այդ կազմակերպությունը բացել է, եւ այդ մասին հայտարարել են Կիպրոսի համապատասխան մարմինները: Ես կարծում եմ, որ պետք է նրանց էլ դիմել: Գուցե արտգործնախարարությունը դիմի հարցումով, թե ինչպես է լինում, որ առանց այդ մարդու գիտության հաշիվ է բացվում իրենց մոտ, ու հետո փոխանցումներ են արվում, որ կարծում եմ՝ Կիպրոսի օրենքներով եւս կրիմինալ է, քանզի մարդը, անտեղյակ լինելով, իր հաշվից փոխանցումներ են կատարվում: Որովհետեւ մի բան է հաշիվ բացելը, մեկ այլ բան է այդ հաշվին եղած գումարը փոխանցել, որովհետեւ մարդը եթե տեղյակ չէ, որ իր հաշվից գումար է փոխանցվում, դա ցանկացած երկրում է կրիմինալ: Ես կարծում եմ, որ այստեղ զբաղվելու լուրջ հարց կա:

- Պարոն Մարգարյան, Ձեր խոսքից հասկացվեց, որ ամիսներ առաջ վարչապետի պաշտոնանկության համար հիմքեր կային, ինչը, սակայն, չարվեց, ինչո՞ւ է այդ դեպքում հիմա եւս շրջանառվում այդ հարցը…

- Գիտեք, «պաշտոնանկություն» տերմինն այնքան էլ ճիշտ չէ, այդպիսի հարց չի քննարկվել, քննարկվել է կառավարության գործունեությունը, ծրագիրը, բյուջեի կատարողականը: Մենք մեր վերաբերմունքն արտահայտել ենք եւ ասել ենք, որ եւ կատարողականը, եւ հատկապես կառավարության ծրագիրն առաջիկա չորս տարիների համար բավարար չէ, որպեսզի մեր երկրի առջեւ ծառացած մարտահրավերներին դիմակայենք, եւ դեմ ենք քվեարկել այդ ծրագրին: Ֆորմալ կերպով որեւէ պաշտոնանկության հարց չենք քննարկել:

Առավել մանրամասն` «Հրապարակ»-ի հունիսի 29-ի համարում: