Կարծում եմ՝ Մխիթարյանը մեծ սխալ է գործում. Լուչեսկու

Դոնեցկի «Շախտյորի» գլխավոր մարզիչ Միրչա Լուչեսկուն մեկնաբանել է Հենրիկ Մխիթարյանի տրանսֆերի շուրջ ստեղծված իրավիճակը, ով, ըստ մամուլի, բանակցություններ է վարում «Լիվերպուլի» հետ:

«Դեռևս չեմ ցանկանում մեկնաբանություններ և որևէ հայտարարություն անել: Դա նրա որոշումն է: Կարծում եմ՝ Մխիթարյանը մեծ սխալ է գործում: Հենրիկը խաղում է այնպիսի ակումբում, որը յուրաքանչյուր տարի պայքարում է չեմպիոնության, գավաթի կամ էլ Չեմպիոնների լիգայի համար: Կարծում եմ՝ նա պետք է դա գնահատեր: Ամբողջ թիմը նրան օգնում էր, որ նա հնարավորինս շատ հայտնվեր տուգանային հրապարակում և հեղինակեր այդքան շատ գոլ: Ցանկանում եմ, որ նա շատ լավ մտածի: Ժամանակ դեռ կա:  Չէի ցանկանա, որ Մխիթարյանը կրկին հասնի այն խաղային մակարդակին, որն ուներ մինչև «Շախտյոր» գալը: Այլ ակումբում խաղի կազմակերպման այլ ձևերի դեպքում Մխիթարյանի՝ այստեղ ցուցադրած խաղային որակը կարող է կորել: Ես պարզապես կոչ եմ անում նրան վերադառնալ թիմ և սկսել աշխատել: Սա նրա թիմն է: Ոչինչ տեղ չի ունեցել Մխիթարյանի և թիմի ղեկավարության, ինչպես նաև՝ ֆուտբոլիստների միջև: Նրան բոլորն էին օգնում, հնարավոր է՝ նույնիսկ ավելի շատ, քան մյուս ֆուտբոլիստներին: Եվ երբ նա վնասվածք էր ունենում, և երբ խաղում էր առաջնությունում, ես հազվադեպ էի նրան փոխարինում, օգնում էի, որ դառնա լավագույն ռմբարկուն: Եթե նա, այնուամենայնիվ, հատնվի «Շախտյորից» բարձրակարգ թիմում, ես երևի կհասկանամ նրա ցանկությունը: Խոսում եմ այնպիսի ակումբների մասին, ինչպիսիք են «Բավարիան», «Բարսելոնան», «Ռեալը»»,- Լուչեսկուի խոսքերը մեջբերում է ակումբի պաշտոնական կայքը: