«ՀայՌուսգազարդ» ՓԲԸ-ն՝ որպես առանձին իրավաբանական անձ, շահութահարկի հաշվեգրում և վճարում պետբյուջե չի իրականացրել

Վախթանգ Սիրադեղյանի ֆեյսբուքյան էջում գրառման վերաբերյալ՝ թե «ՀայՌուսգազարդ» ՓԲԸ-ն 60 մլրդ վնասի պարագայում ՀՀ պետ. բյուջե է վճարել 6 մլրդ դրամ շահութահարկ, «ՀայՌուսգազարդ»-ի հասարակայնության հետ կապերի ծառայությունից Լուրեր.com-ին հայտնեցին, հետևյալ մասնագիտական մեկնաբանությունը.

«Գրառում կատարողը հավանաբար օգտվել է ընկերության միջազգային ստանդարտներին համապատասխան համախմբված ֆինանսական հաշվետվությունների՝ համախմբված ֆինանսական արդյունքների մասին հաշվետվությունից և ՀՀ կառավարությանն առընթեր ՊԵԿ-ի կայքի հարկ վճարողների և նրանց կողմից վճարված հարկերի և տուրքերի մեծությունների վերաբերյալ տեղեկատվական ցանկից, վերջինում հստակ նշված է, որ «ՀայՌուսգազարդ» ՓԲԸ-ն ուղղակի հարկեր (այդ թվում՝ շահութահարկ, եկամտահարկ) վճարել է 1.522 մլդ դրամ: Նշված գումարը ներառում է 1.129 մլրդ դրամ եկամտային հարկ և 0.393 մլրդ դրամ ոչ ռեզիդենտի շահութահարկ: Մասնագետների համար հասկանալի է, որ ոչ ռեզիդենտի շահութահարկը բացառապես կապված չէ ընկերության շահույթից և այն ընկերությանը ծառայություններ մատուցող ոչ ռեզիդենտներին վճարված եկամուտներից պահված և ՀՀ պետ. բյուջե փոխանցված հարկի գումար է:

Ինչ վերաբերվում է հրապարակված համախմբված ֆինանսական արդյունքների մասին հաշվետվության 6.002 մլրդ դրամ ծախսագրված շահութահարկին, ապա այն բաղկացած է 5.914 մլրդ դրամ հետաձգված հարկային ակտիվի դուրս գրումից և 0.088 մլրդ դրամ դուստր ընկերությունների շահութահարկի գումարներից: Հետաձգված հարկային ակտիվը խիստ մասնագիտական կատեգորիա է, որը հասկանալու և մեկնաբանություններ կատարելու համար պետք է ունենալ համապատասխան գիտելիքներ և տիրապետել Հաշվապահական հաշվառման միջազգային ստանդարտներին, մասնավորապես ՀՀՄՍ 12 (Շահութահարկեր) ստանդարտին:

Հաշվի առնելով վերոգրյալը հայտնում ենք, որ «ՀայՌուսգազարդ» ՓԲԸ-ն՝ որպես առանձին իրավաբանական անձ, 2012թ. շահութահարկի հաշվեգրում և ՀՀ պետ. բյուջե վճարում չի իրականացրել»: