«Ադրբեջանի ժողովուրդը մեզ հետ է». Գրիգորի Այվազյանը կառաջադրվի Ադրբեջանում

2013թ. հոկտեմբերին կայանալիք նախագահի ընտրություններին իր թեկնածությունն է առաջադրելու նաև ծնունդով Բաքվից, Ադրբեջանահայերի ասամբլեայի նախագահ Գրիգորի Այվազյանը: Խոսելով իր մասնակցության մասին՝ լրագրողների հետ հանդիպման ընթացքում նա ասաց, որ իր թիմի նախապատրաստական աշխատանքներն արդեն ավարտվել են, անգամ կան լրագրողներ, ովքեր պատրաստ են մեկնել իր հետ Բաքու և լուսաբանել ողջ նախընտրական քարոզարշավը:

«Իլհամ Ալիևի օգտին գործում է պետական վարչական ապարատը, իսկ Ադրբեջանի ժողովուրդն իրականում կողմնակից չէ Ալիևին։ Ադրբեջանի ժողովուրդը մեզ հետ է։ Դա ադրբեջանցի թուրքերի մասին չէ խոսքը, այլ ադրբեջանցի ժողովուրդների մասին, որոնց մասը նաև մենք ենք կազմում՝ ադրբեջանահայերը։ Արդեն սկսել ենք քարոզարշավը, հավաքել ենք համապատասխան թիմ, և եթե դեռ չենք մեկնել, դա արդեն օրերի հարց է։ Ուղղակի սպասում ենք Ադրբեջանի ԱԳՆ-ի և ՆԳՆ-ի անվտանգությունան երաշխիքներին։ Բայց ոչ թե իմ հանդեպ, այլ ինձ հետ մեկնող հայ քաղաքացիների հանդեպ։ Որոնց կյանքի համար մենք պատասխանատու ենք և չենք կարող ռիսկի դիմել այդ հարցում։ Իսկ այլ հարցեր՝ ֆինանսական, լուսաբանման, արդեն համարում ենք լուծված։ Իսկ քարոզարշավն անցկացնել Ադրբեջանում նախատեսել ենք առաջին հերթին ԶԼՄ-ների միջոցով»։

Հարցին` ինչով է պայմանավորված Մեհրիբան Ալիևի թեկնածության առաջադրումը, Այվազյանն ասաց, որ դա զուտ ձևական բնույթ ունի: Այդ կերպ գործող իշխանությունը ցանկանում է ցույց տալ, որ առաջադրվել կարող են բոլորը: Վերջինիս կարծիքով՝ Ալիևների կլանը ոչ մի դեպքում իշխանությունը չի զիջի Փաշաևների կլանին: