Այսօր թատերական գործի ռանչպար Ռաֆայել Ջրբաշյանի ծննդյան օրն է

«Մեր գործի` թատերական գործի ռանչպարն է: Արդեն քանի տասնամյակ լծվել է «թատրոն» ասվածի ծանր սայլին ու քաշում է: Վարում ու ցանում է, հնձում ու իր աշխատանքի պտուղները վայելում է թատրոն-հրաշքի մեծ, շատ մեծ այգում: Պտուղներն էլ իր շնորհակալ ու շնորհաշատ ուսանողներն են, որ հայ թատերական իրականության դիմագիծն են ամբողջացնում»:

Սոս Սարգսյան

Բեմադրիչ Ռաֆայել Ջրբաշյանը ծնվել է 1923 թ. հուլիսի 2-ին, Կիսլավոդսկում: Սովորել է Թիֆլիսի պետական մանկավարժական ինստիտուտի ռուսաց բանասիրության բաժնում: 1949թ. եղել է Երևանի գեղարվեստա-թատերական ինստիտուտի ռեժիսորական ֆակուլտետի առաջին շրջանավարտը` պրոֆեսոր Վ.Վարդանյանի ղեկավարությամբ: Դասավանդել է Երևանի դպրոցներում: 1954-69 թթ. աշխատել է Երևանի Սպենդիարյանի անվան օպերայի և բալետի թատրոնում` որպես ռեժիսոր և բեմադրիչ: Բեմադրել է Մասկանյիի «Գեղջկական ասպետություն», Ստեփանյանի «Լուսաբացին» (Ա.Գուլակյանի հետ), Ռուբինշտեյնի «Դևը», Հարությունյանի «Սայաթ-Նովա» և այլ ստեղծագործություններ: 1971-73 թթ. եղել է Վանաձորի Աբելյանի անվան թատրոնի գեղարվեստական ղեկավարը, 1975-90թթ` Արտաշատի Խարազյանի անավան և միջշրջանային թատրոնների գեղարվեստական խորհրդատուն: 1957թ-ից դասավանդում է Երևանի թատրոնի և կինոյի պետական ինստիտուտում, որտեղ եղել է ամբիոնի վարիչ, պրոռեկտոր, 1985թ-ից` պրոֆեսոր: Նրա ջանքերով ինստիտուտում ստեղծվել է ռեժիսուրայի ամբիոնը և բեմանկարչության բաժինը: Նրա աշակերտներից են եղել հետագայի բազմաթիվ դերասաններ, հաղորդավարներ, թատրոնների գեղարվեստական ղեկավարներ, բեմադրիչներ, ժողովրդական արտիստներ: Գրել է բազմաթիվ մասնագիտական հոդվածներ, խոհեր, գրքեր, կատարել է թարգմանություններ: Արժանացել է ՀԽՍՀ արվեստի վաստակավոր գործչի, 2008թ.` ՀՀ ժողովրդական արտիստի կոչմանը: