Հուլիսի 3-ին մահացել է ռազմական գործիչ Հակոբ Մելքումյանը

Հայազգի խորհրդային ռազմական գործիչ Հակոբ Արշակի Մելքումյան ծնվել է 1885 թ. դեկտեմբերի 12 (24), Շուշիում:

Բանակ է զորակոչվել 1907 թվականին, մասնակցել է Առաջին աշխարհամարտին: 1917թ. Հոկտեմբերյան հեղափոխությունից հետո անցել է բոլշևիկների կողմը: 1918 թ. ամռանից 1-ին մոսկովյան հեծելազորային գնդի հրամանատար, որը մարտեր է մղել հարավային ուղղության վրա: 1919 թ. վերջերից 1-ին Տուրկեստանական դիվիզիայի 1-ին բրիգադայի հրամանատար: Մասնակցել է Բուխարայի գրավմանը: 1920-23թթ. մասնակցել է բասմաչների խմբերի ոչնչացմանը: 1921 փետրվարին նրա ղեկավարությամբ հեծելազորային բրիգադը գրավել է Դենաու և Յուրչի քաղաքները, ինչի համար նա արժանացել է Կարմիր Դրոշի շքանշանի: Էնվեր փաշայի և նրա գլխավորած հրոսակախմբի ոչնչացման համար (1922 թ. ամառ) ստացել է Կարմիր դրոշի երկրորդ շքանշանը: 1924 թ. նշանակվել է Թուրքեստանյան հեծելազորային բրիգադայի 8-րդ բաժնի հրամանատար: 1924-31թթ. նրա ղեկավարած ստորաբաժանումը ոչնչացրել է Տաջիկիստանում և Թուրքմենիայում բասմաչության մնացուկները: 1934-37թթ. զբաղեցրել է Միջինասիական ռազմական օկրուգի ղեկավարի օգնականի պաշտոնը: 1937 թ. հունիսին ձերբակալվել է: «Ռազմա-ֆաշիստական դավադրությանը» մասնակցելու մեղադրանքով դատապարտվել է 15 տարվա ազատազրկման և 5 տարով քաղաքացիական իրավունքներից զրկման: 1954 թ. ազատ է արձակվել և ռեաբիլիտացվել է:

Մահացել է 1962թ. հուլիսի 3-ին, Մոսկվայում: