Ստամբուլյան հռչակագիր` ղարաբաղյան խնդրի մեկտողանոց անդրադարձով

«Կոչ ենք անում ԵԱՀԿ Մինսկի խմբի համանախագահներին շարունակելու Հայաստանի եւ Ադրբեջանի հետ իրենց ներգրավվածությունը ղարաբաղյան հակամարտության լուծումներ գտնելու ուղղությամբ», այսպիսի կետ պարունակող հռչակագիր է ընդունվել հունիսի 29-ից հուլիսի 3-ը Ստամբուլում գումարված ԵԱՀԿ խորհրդարանական վեհաժողովի ամառային նստաշրջանում:

ԵԱՀԿ պաշտոնական կայքէջում տեղադրված եռալեզու փաստաթղթի 39-րդ կետի համաձաայն աջակցություն է հայտնվում մասնակից երկրների ինքնիշխանության, տարածքային ամբողջականության եւ միջազգայնորեն ճանաչված սահմանների անխախտելիության սկզբունքներին, որն ադրբեջանական մամուլին առիթ է տվել հայտարարությունների եւ մեկնաբանությունների, թե ԵԱՀԿ մակարդակով այսպիսի ընդգծում է արվել' առանց ազգերի ինքնորոշման սկզբունքը նշելու:

Որ ազգերի ինքնորոշման իրավունքի մասին չի խոսվում, իհարկե, ԵԱՀԿ բնութագրականներից է, սակայն ղարաբաղյան հարցում այլ են մեկնաբանությունները, ի համեմատություն, ասենք, աբխազական ու հարավօսական խնդիրների պարագայի, երբ գրեթե յուրաքանչյուր միջազգային մակարդակով արված հայտարարությամբ նշվում է տարածքների վերադարձը տեսնելու ցանկության մասին:

Նույն այս փաստաթուղթը, որտեղ տարածքային ամբողջականությունը շեշտված է որպես սկզբունք, ընդգրկում է նաեւ Աբխազիային եւ Հարավային Օսիային վերաբերող դրույթները' հակամարտությունների առնչությամբ ընդհանուր ձեւակերպումներում: Մասնավորապես, հռչակագրի 33-րդ դրույթը «կոչ է անում ակտիվացնել քաղաքական ջանքերը' չլուծված հակամարտությունների խաղաղ եւ կենսունակ լուծման հասնելու ուղղությամբ», ինչպես նաեւ ԵԱՀԿ ղեկավարությանն ու հակամարտությունների կողմերին կոչ է անում կրկնապատկել ջանքերը ձգձգված հակամարտությունների լուծման համար Կովկասում եւ Մոլդովայում:

Մանրամասները «Ազգ»-ի այսօրվա համարում: