Մոլդովայի խորհրդարանը ցավում է ԱԺ-ում պատահածի համար. Մոլդովայի ՍԴ անդամ

Երեկ Ազգային ժողովում ընթացող «Իրավունքի գերակայության եվրոպական չափորոշիչներն ու իշխանությունների հայեցողության սահմանները Եվրոպայի խորհրդի անդամ երկրներում» թեմայով համաեվրոպական խորհրդաժողովի ժամանակ Մոլդովայի խորհրդարանական փաստաբան Աուրելիա Գրիգորիուն հայտարարեց. «Հայաստանը գրավել է Ադրբեջանի տարածքների 20 %-ը՝ ադրբեջանցիների նկատմամբ իրականացնելով ցեղասպանություն»: Նա նաև նշեց, որ Խոջալուի «ցեղասպանությունը» իրականացրել են հայերը, ինչն այլևս միջազգայնորեն ճանաչված փաստ է: Խորհրդաժողովի մի շարք մասնակիցներ ծափահարեցին նրա այս ելույթին:

Այսօր լրագրողների հետ հանդիպմանը Մոլդովայի ՍԴ անդամ, պրոֆեսոր, նախկին պատգամավոր Վիկտոր Պոպան, խոսելով երեկ ԱԺ-ում գրանցված միջադեպի մասին, նշեց, որ դա պաշտպանի անձնական կարծիքն էր և դա չի կարող լինել ղեկավարության կամ խորհրդարանի կարծիքը:

«Երեկ ԱԺ-ում ծայրահեղ տհաճ միջադեպ է պատահել: Դա այն տեղը չէր, և այն մարդիկ չէին, ովքեր լիազորություններ ունեին այդպիսի հայտարարություններ անել: Ես չգիտեմ՝ ով է նրան այդպիսի լիազորություններ տվել, ինչպես, ինչ սկզբունքով, ամենայն հավանականությամբ, դա նրա անձնական կարծիքն էր»,-ասաց ՍԴ անդամը՝  խոստանալով այդ հարցը պարզաբանել:

Վիկտոր Պոպան նշեց, որ ինքը երեկ խոսել է խորհրդարանի ներկայացուցիչների հետ և նրանց անունից լիազորված է հայտնել.

«Մենք ցավում ենք այդ միջադեպի համար, և մեր ղեկավարությունը խոստանում է, որ սա պարզաբանումների համար հիմք է լինելու, որտեղից այսպիսի լիազորություններ, ու որտեղից նման նյութ»:

Դիտարկմանը, թե օմբուդսմենը շատ է սիրում Ադրբեջանը, նա արձագանքեց. «Ես չգիտեմ, ես նրա հետ անձնապես ծանոթ չեմ»: