Այսօր Երուխանի ծննդյան օրն է

Հայ գրող, հրապարակախոս, թարգմանիչ և մանկավարժ Երուխանը (Երվանդ Պողոսի Սրմաքեշխանլյան) ծնվել է 1870 հուլիս 5–ին Կոստանդնուպոլսում:

Սովորել է ծննդավայրի Ներսեսյան և Կեդրոնական վարժարաններում:

1890-ից աշխատել է «Արևելք» խմբագրությունում:

1891-1896 թվականներին «Արևելք»-ի և «Մասիս»-ի էջերում հրատարակել է մի շարք նովելներ՝ շարունակելով ու զարգացնելով 1880-ական թվականների արևմտահայ ռեալիստական գրականության ավանդույթները:

1896-ի հայկական կոտորածների օրերին տեղափոխվել է Բուլղարիա, 1904 թվականին անցել Եգիպտոս:

Տարագրության մեջ (1899-1908) շարունակել է գրական, խմբագրական աշխատանքը, զբաղվել մանկավարժությամբ (Վառնայի, Ալեքսանդրիայի, Կահիրեի ազգային վարժարաններում): Գաղթական, Ե. Գաղթական, Աշուղ ծածկանուններով Կոստանդնուպոլսի «Բյուզանդիոն» թերթում հոդվածներ է տպագրել հայ գաղթականների կյանքից:

1908-ին Երիտթուրքական հեղափոխությունից հետո, վերադարձել է Կոստանդնուպոլիս, նշանակվել է «Արևելք» թերթի խմբագիր, միաժամանակ դասավանդել ազգային Կեդրոնական, իսկ 1913 թվականից՝ Խարբերդի ազգային վարժարաններում: Սպանվել է Խարբերդում 1915-ին՝ Մեծ Եղեռնի ժամանակ: