Մենք բանակցում ենք «Բորուսիայի» հետ. Պալկինը Մխիթարյանի տեղափոխության մասին

Դոնեցկի «Շախտյորի» գլխավոր տնօրեն Սերգեյ Պալկինը sportsdaily-ին տված հարցազրույցում խոսել է Հենրիկ Մխիթարյանի՝ «Բորուսիա» տեղափոխվելու հարցի մասին և հաստատել, որ կողմերը բանակցություններ են վարում:

- Հենրիկ Մխիթարյանը, այնուամենայնիվ, ձեզ հետ կապ հաստատե՞լ է։

- Ո՛չ: Համենայն դեպս, ես նրա հետ չեմ խոսել։

- Կարո՞ղ եք հաստատել, որ «Բորուսիան» հայտարարել է ֆուտբոլիստի տրանսֆերը 23 մլն եվրոյով գնելու պատրաստակամության մասին։

- Ճշգրտեմ՝ նրանք առաջարկում են 25 մլն:

- «Շախտյորին» այդ գումարը ձեռնտո՞ւ է։

- Ո՛չ: Սակայն մենք բանակցում ենք գերմանական ակումբի հետ։

- Գումարի հարցում փոխզիջում հնարավո՞ր է։ 

- Դեռևս պատրաստ չեմ պատասխանել, տեսնենք:

- Ի՞նչ ժամկետներում հարցը վերջնականապես կլուծվի։

- Հավանաբար, առաջիկայում մենք ընդհանուր հայտարարի գանք։ 

- Բանակցությունների ընթացքում Մխիթարյանի պահվածքը հաշվի առնվելու է։

- Ո՛չ, դրանք բացարձակ տարբեր բաներ են: Եթե նա մնա «Շախտյորում», այդ ժամանակ էլ նրա պահվածքը հաշվի կառնենք և պատժամիջոցներ կկիրառենք:

- Նա իսկապես անձնական պայմանագրի շուրջ համաձայնությա՞ն է եկել «Բորուսիայի» հետ:

- Ինձ այդ մասին ոչինչ հայտնի չէ: Հենրիկը ակումբ չի զանգել, և նրա գործակալի հետ էլ չեմ խոսել: Նման հարցերը պետք է տալ ֆուտբոլիստին: