Աուրելիա Գրիգորին ու իր սիրելի Ադրբեջանը նոր սկանդալներ են հորինում

Ազգային ժողովում «Իրավունքի գերակայության եվրոպական չափորոշիչներն ու իշխանությունների հայեցողության սահմանները Եվրոպայի խորհրդի անդամ երկրներում» թեմայով համաեվրոպական խորհրդաժողովի ժամանակ Մոլդովայի խորհրդարանական փաստաբան Աուրելիա Գրիգորիուի հայտարարություններից հետո ադրբեջանական կողմը սկսել է հակաքարոզչությունը: Մասնավորապես, ադրբեջանական apa.az գործակալությունը գրել է.

«Աուրելիայի ելույթից երկու օր հետո նրան սպառնում են Երևանում, և նա վախենում է լքել հյուրանոցը»: Այս մասին գործակալությանը հայտնել է Մոլդովայի մարդու իրավունքների պաշտպանի ամուսին Դմիտրի Գրիգորիուն:

Նրա խոսքերով՝ ելույթից հետո անընդհատ համացանցով սպառնալիքներ են գալիս, գրում են բոլոր հնարավոր կոնտակտներով, սոցիալական ցանցերով, Մոլդովայի խորհրդարանկան փաստաբանի պաշտոնական կայքում:

Դմիտրի Գրիգորիուի խոսքով՝  այսօր երեկոյան նա պետք էր թռներ տուն Մոլդովա, սակայն նրան նստեցրել են ավտոմեքենա, որը պետք է պատվիրակությունը տեղափոխեր օդանավակայան, մնացածը մեկնել են, իսկ նա մնացել է: Երեկ երեկոյան տրվել է երաշխիք, որ նա կժամանի օդանավակայան, և կապահովվի նրա անվտանգությունը: Սակայն գիշերը ավտոմեքենան նրան չի վերցրել, նա մնացել է հյուրանոցում, չնայած որ հյուրանոցում մնալու ժամկետն ավարտվում է կես ժամից,-հայտնել է Դ. Գրիգորիուն:

Նշենք, որ հրապարակումից հետո Lurer.com-ի թղթակիցը բազմիցս փորձեց կապ հաստատել ԱԳՆ մամլո խոսնակ Տիգրան Բալայանի հետ, սակայն վերջինս չէր պատասխանում հեռախոսազանգերին։