Շղթայական թանկացումները սկսված են. Երևան-Էջմիածին երթուղին սպասարկող տաքսիները բարձրացրել են վարձավճարը

Ինչպես ավելի վաղ տեղեկացրել էինք, երեկվանից ՀՀ քաղաքացիներին մատակարարվող գազի և էլեկտրաէներգիայի սակագների փոփոխությունները մտան ուժի մեջ: 1 կվ/ժամ էլեկտրաէներգիան Հայաստանի բնակչության համար թանկացավ 8 դրամով՝ 30 դրամից դառնալով 38 դրամ, իսկ գազի նոր սակագինը՝ 156 դրամ յուրաքանչյուր խորանարդ մետրի դիմաց: Մինչև այդ, գործող սակագինը 132 դրամ էր:

Այս ամենը հանգեցնում է շղթայական թանկացման: Գազի սակագնի բարձրացմանը այսօրվանից հաջորդեց որոշ տաքսիների վարձավճարի թանկացումը: Օրինակ, Երևան-Էջմիածին երթուղին սպասարկող տաքսիները նախկին 300 դրամի փոխարեն այժմ փոխադրումները կկատարեն 400 դրամով: 

Նշենք, որ այս երթուղուց օգտվողները հիմնականում տեղափոխվում են այս տաքսիներով, որոնք Երևանը Էջմիածնի հետ կապող կամուրջ են:

Lurer.com-ի թղթակցին այսօր իր բողոքը հայտնեց Էջմիածնից Երևան եկող քաղաքացիներից մեկը, ով բոլոր աշխատանքային օրերին գալիս է Երևան՝ աշխատանքի.

«Իրականում այս թանկացումները մեզ ստիպում են հեռանալ այս երկրից: Ես ինչպես կարող եմ օրը 800 դրամ տալ միայն Մաշտոցի պողոտա հասնելու համար, այնտեղից էլ ուրիշ տրանսպորտ եմ նստում, որ հասնեմ իմ աշխատավայր: Չէ՛, այսպես դժվար է. օրական աշխատածս 2000 դրամից 1000 դրամը տալիս եմ տրանսպորտի փող: Ես ոնց կարող եմ 1000 դրամով ընտանիք պահել։ Դու կարո՞ղ ես: Դե բերեք էդ պաշտոնյաներից մեկին 1000 դրամ տանք, տեսնենք` ինքը կարա ապրի: Մենակ մտքից, որ ծախսելու փող չունի, կգժվի Բա որ իմանա` էրեխեն կոշիկ չունի, սովածա, ի՞նչ կանի: Ժողովրդի արյունը խմում են, խը-մում»,- ասաց Էջմիածինաբնակ մեր զրուցակիցը:

Տաքսու վարորդներից մեկն էլ մեզ հետ զրույցում նշեց, որ թանկացումը սպասելի էր, քանի որ գազի սակագնի բարձրացման պայմաններում  վարձավճարը չթանկացնելն ուղղակի անհնար էր. «Արևի տակ ամբողջ օրը Երևան-Էջմիածին գծի մեջ ենք, այ քուր ջան, բա փող չաշխատե՞մ` էրեխեքիս պահեմ: Հո աշխատածս սաղ չեմ տալու` գազ լցնեմ, ինձ էլ տակը փող չմնա: Ես էլ եմ երեխա պահում, հո մարդկանց սիրուն աչքերի համար տաքսի չեմ քշում»,- ասաց տաքսու վարորդներից մեկը: