Հայազգի ոսկերիչը փայլել է «Համաշխարհային հմտություններ 2013» մրցույթում (տեսանյութ)

Երևանի տարածաշրջանային համար 1 քոլեջի ոսկերչության բաժնի ուսանող Արամ Ավետիսյանը Լայպցիգում կայացած «Համաշխարհային հմտություններ 2013» մրցույթի ժամանակ ստացել է «Երկրի լավագույն մասնակից» մրցանակը: 

Հայաստանյան մրցումներն անցկացվել են տարբեր քոլեջների ուսանողների միջև։  Նրանցից ընտրվել են երեք լավագույնները՝ ոսկերիչ, խոհարար և մոդելավորող, ովքեր էլ այս տարի Հայաստանը ներկայացրին Լայպցիգում:

Հայազգի ոսկերիչին 4 օր էին տրամադրել Բրազիլիայի ներկայացրած զարդը՝ World skills-ի լոգոն պատրաստելու համար։

Lurer.com-ի թղթակցի հետ զրույցում Արամը տեղեկացրեց, որ այս տարի մրցույթին 50-ից ավելի երկրներ են մասնակցում, իսկ ոսկերչության խմբում կար 16 մասնակից:

Արամի կարծիքով՝ այս մրցույթը շատ կարևոր է արհեստագործական կրթության ասպարեզում. այն հնարավորություն է տալիս մեր կրթության  բարձր որակը ներկայացնել համաշխարհային շուկայում:

Վերջինիս խոսքով՝ սրանից էր կախված՝ Հայաստանը հետագայում կարող է որպես լիարժեք անդամ մասնակցել այդ մրցումներին, թե՞ ոչ:

Նշենք, որ մեր պատվիրակները գնացել են Գերմանիա անցած տարի կազմակերպված «Համաշխարհային հմտությունները Հայաստանում» մրցույթի ամփոփումից հետո, որը կազմակերպել էին ՀՀ ԿԳ նախարարությունը և Մասնագիտական կրթության ուսուցման զարգացման ազգային կենտրոնը: