Կախված զինծառայողի մարմինը «մաքուր» է եղել

Երեկ Սյունիքի Շաղատ գյուղում հողին էին հանձնում հուլիսի 5-ին ինքնասպան եղած զինվոր Գաբրիել Լալազարյանին: Նա 19 տարեկան էր եւ զորակոչվել է հայկական բանակ 2012 թվականին:

Թերթի տեղեկություններով, Գաբրիելը ծառայությունը կրում էր Ռազմական ոստիկանության զորամասերից մեկում, ինչը հաստատեց ՊՆ խոսնակ Արծրուն Հովհաննիսյանը: Նա այստեղ է տեղափոխվել Արմավիրի մարզի մեկ այլ զորամասից: Ոչ պաշտոնական տվյալներով, այդ օրը Գաբրիելը հերթապահել է ճաշարանում, որտեղ եւ նրան տեսել են վերջին անգամ: Մի քանի ժամով նա անհետացել է ընկերների տեսադաշտից, իսկ երեկոյան ժամը 22-ի սահմաններում Գաբրիելի մարմինը գտել են ալեհավաքի աշտարակից սավանով կախված վիճակում: Զորամասին մոտ տեղեկացված աղբյուրը հաղորդում է, որ տղայի մարմնի վրա հայտնաբերված միակ վնասվածքը պարանոցի շրջանում սավանի հետքն է եղել: Մարմնի մնացած մասերը «մաքուր» են եղել: Բանակային ծառայության ընթացքում Գաբրիելը մեկ անգամ էլ է ինքնասպանության փորձ կատարել՝ կտրել է երակները, երբ դեռ Արմավիրի մարզում է ծառայելիս եղել:

Այն ժամանակ հաջողվել է տղային փրկել: Այդ դեպքից հետո նա տեղափոխվել է Կանազի հեգեբուժարան, քանի որ հոգեկան խնդիրներ է ունեցել:

Արդյո՞ք այդ խնդիրները ծառայության ընթացքում են առաջացել, թե՞ավելի վաղ են ի հայտ եկել, եւ երիտասարդը հոգեկան հիվանդությամբ է տառապել դեռեւս զորակոչվելուց առաջ, հետեւապես, նրան ապօրինաբար են բանակ տարել՝ այս հարցին փորձում է պատասխանել նախաքննական մարմինը:

Առավել մանրամասն`«Հրապարակ»-ի հուլիսի 9-ի համարում: