Գառնու ձորը՝ սեփականաշնորհվա՞ծ

Հանգստի սեզոնը բացվելուն պես սկիզբ է առնում փող աշխատելու մի նոր տարբերակ: Տարբեր հանգստյան գոտիներ որոշակի գումարով տարածք են տրամադրում հանգստացողներին, որպեսզի վերջիններս կարողանան իրենց մեկ օրը անցկացնել բնության գրկում: Գառնու ձոր մտնելու համար ևս գումար է նախատեսված. մեկ մեքենայի համար պարտավորվում ես վճարել 1000 դրամ, ու նշանակություն չունի, թե այդ ձորում դու ինչպես ես կազմակերպելու հանգիստդ: Միևնույն է, եթե որոշել ես մտնել, պետք է վճարես:

Կոնկրետ այդ տարածքում գումարները վճարվում են ոմն Շմավոն Համբարձումյանի: Հենց նրանից էլ փորձեցինք պարզել, թե ինչ սկզբունքով են գանձում այդ գումարները։ Շմավոն Համբարձումյանն ասաց, որ գումարներ են գանձում միայն «պիկնիկ կազմակերպողներից», իսկ այն մարդիկ, ովքեր գալիս են տեսնելու Գառնու «Քարերի սիմֆոնիա» հուշակոթողը, դրա համար գումար չեն վերցնում.

«Մենք քարերի սիմֆոնիա եկողներից գումար չենք վերցնում, մեքենան կանգնեցնում են վերևում, ոտքով իջնում են, ման են գալիս, վերադառնում են: Մարդիկ չեն ուզում 1000 դրամ վճարել, որ գնան հանգստանալու իմ սեփական հողի մեջ:

-Այսինքն՝ դուք սեփականաշնորհե՞լ եք տարածքը։

-Չէ, ո՞նց կարամ սեփականաշնորհեմ, ոնց որ 100 ընտանիք է ստացել, ընենց էլ ես եմ ստացել, ու հիմա իմ հողում մարդիկ գալիս են, հանգստանում են։ Ես, փոխանակ 5000 դրամ վերցնեմ, փոխանակ 10000 դրամ վերցնեմ ուրիշ հանգստի գոտիների նման, վերցնում եմ 1000 դրամ, ճանապարհներն եմ սարքում, աղբն եմ մաքրում, մնացածն էլ մուծում եմ պետական տուրք, «կասվի ապարատը» դրած ա, ես պետական տուրք եմ մուծում: 

Չհասկացա՝ ամոթ էլ չեն անում, 1000 դրամ մուծում են, գալիս ձեզ են հասցնում: Կան մարդիկ, ովքեր իմ հարևանությամբ ունեն հողեր, բայց նրանց ճանապարհը հարմար չի, նրանք ոչինչ չեն անում՝ ո՛չ պետական տուրք են տալիս, ո՛չ ճանապարհ են սարքում, իսկ ես պետական հարկը մուծում եմ, սանմաքրումը կատարում եմ. բոլորը ես եմ անում: Ես ունեմ սեփականության վկայական, ունեմ իմ տարածքը, որը դարձրել եմ հանգստի գոտի:

Եթե մեկը լինի, ասի՝ ես գնացել եմ Քարերի սիմֆոնիա, փող եմ տվել, ես իրան դատի կտամ:

-Իսկ ինչո՞ւ եք մաքրման աշխատանքները դուք անում, համայնքը ինչո՞ւ չի հոգում այդ խնդիրները:

-Աղջի՛կ ջան, եթե իմ հանգստի գոտին ա, ես եմ անում, ո՞նց կլինի: Ես ոչ մի օրենքի խախտում չեմ անում, թե չէ հիմա ոստիկանությունը, մյուսը... մյուսը ինձ նեղություն կպատճառեին:

Շմավոն Համբարձումյանի բիզնեսի վերաբերյալ մեկնաբանություն խնդրեցինք նաև Տարածքային կառավարման նախարարությունից, որի հասարակայնության հետ կապերի բաժնից մեզ պատասխանեցին. «ՀՀ տարածքային կառավարման նախարարությունը համայնքների վարչական սահմաններում գտնվող հողեր տնօրինելու' վարձակալության կամ սեփակաշնորհման տալու իրավասություն չունի:

Այդ իրավասությունը պատկանում է համայնքին»:

Համայնքապետի հետ մեզ չհաջողվեց կապ հաստատել. վերջինս, հավանաբար, շատ զբաղված էր և չէր կարող պատասխանել հեռախոսազանգերին:

Նելլի Ավետիսյան