Սերժ Սարգսյանը կարկուտից տուժած համայնքներին օգնելու համար փոխանցել է 80 մլն դրամ

Սերժ Սարգսյանը մայիսի 12-ին Արմավիրի մարզում տեղացած կարկուտից տուժած համայնքներին օգնելու նպատակով ստեղծված «Բնական աղետից տուժածների հիմնադրամ»-ին փոխանցել է 80 մլն դրամ (200 հազար ԱՄՆ դոլարից քիչ պակաս): Հիմնադրամի նախաձեռնության հեղինակ, ԱԺ պատգամավոր Ալեքսան Պետրոսյանը «Ժողովուրդ»-ին տեղեկացրեց, որ փոխանցումը կատարվել է ՀՀ նախագահի հիմնադրամից: Թե ինչ հիմնադրամի մասին է խոսքը կամ որտեղից Սերժ Սարգսյանին այդքան գումար, եթե նրա ամսական աշխատավարձը կազմում է ընդամենը 400 հազար դրամ (մոտ 1000 ԱՄՆ դոլար), մեզ չհաջողվեց ճշտել:

Բայց, անկախ այդ ամենից, ողջունելի է, որ կարկտահարությունից տուժած գյուղացիներին փոխանցված ամենամեծ օգնությունը հենց Սերժ Սարգսյանն է ցուցաբերել՝ ընդ որում, առանձնապես չգովազդելով իր այդ քայլը:

Տեղեկացնենք, որ այդ հիմնադրամի հավաքած ընդհանուր գումարը կազմում է 228 մլն դրամ: «Օգոստոսի 1-ին կավարտվի, եւ բոլորով կհավաքվենք ու կորոշենք, թե ինչպես պետք է հետո վարվենք: Անպայման պետք է մարդկանց բաժանենք այդ գումարը»,-ավելացրեց Ա. Պետրոսյանը: Հիշեցնենք, որ կարկուտի հասցրած վնասի չափը կազմել էր 25 միլիարդ դրամ:

Մանրամասները` «Ժողովուրդ»-ի այսօրվա համարում: