Մխիթարյանի տրանսֆերը հեղինակություն բերեց «Շախտյորին». Սելյուկ

Հայաստանի ազգային հավաքականի կիսապաշտպան Հենրիկ Մխիթարյանի «Բորուսիա» տեղափոխությանն է անդրադարձել ֆուտբոլային գործակալ Դմիտրի Սելյուկը, ով Футбол հեռուստաալիքին տված հարազրույցում նշել է.

«Երեք տարի առաջ ես մասնակցություն ունեցա Մխիթարյանի «Շախտյոր» տեղափոխվելու գործընթացում: Գոհ եմ, որ Մխիթարյանը  խաղացել է դոնեցկյան ակումբում, քանի որ նա «Շախտյորին» հաղթանակներ բերեց, իսկ թիմն էլ Մխիթարյանին դարձրեց բարձրակարգ ֆուտբոլիստ: Կարծում եմ՝ այս տրանսֆերը շատ լավ էր բոլորի համար: «Լիվերպուլը» վաղուց էր հետաքրքրված Մխիթարյանի ծառայություններով և առաջարկում էր նրա համար 25 մլն եվրո: «Բորուսիան» 27,5 մլն-ով իրենց համար տրանսֆերային ռեկորդ սահմանեց: Պայմանագրի համաձայն` կիսապաշտպանի տրանսֆերային իրավունքի 50 տոկոսը պատկանում էր Օլեգ Մկրտչյանին: Այսօր  Մկրտչյանը հայ ֆուտբոլիստի  տրանսֆերից ստացել է 13 միլիոն 750 հազար եվրո: 

Եվ մենք կրկին ականատես ենք լինում, որ «Շախտյորը» եվրոպայի առաջատար ակումբներից մեկն է ո՛չ միայն ֆուտբոլում, այլև ֆուտբոլիստների տրանսֆերների վաճառքի հարցում: Մխիթարյանի տրանսֆերը համաշխարհային արենայում հեղինակություն բերեց «Շախտյորին»:

Հենրիկը հիանալի ֆուտբոլիստ է: Միանշանակ, նա ռմբարկու է: Սակայն «Շախտյորը» արդեն ապացուցել է, որ թիմից հեռանում են շատ ֆուտբոլիստներ, իսկ ակումբը ավելի է ուժեղանում: