Հայաստանի հավաքականի ֆուտբոլիստները պատրաստվում են նոր մրցաշրջանին

Հայաստանի ազգային հավաքականի ֆուտբոլիստների մեծ մասը շարունակում է իրենց ակումբների կազմերում պատրաստվել նոր մրցաշրջանին: ՀՖՖ պաշտոնական կայքը զրուցել է նրանցից մի քանիսի հետ:

Ինչպես գիտենք, Կապանի «Գանձասարը» Եվրոպա լիգայի որակավորման առաջին փուլում մրցում է ղազախական «Ակտոբեի» հետ, որի կազմում հանդես է գալիս Հայաստանի ազգային հավաքականի պաշտպան Ռոբերտ Արզումանյանը: Երևանում կայացած առաջին խաղում Արզումանյանը բացակայում էր ղազախական թիմի հայտացուցակից: ՀՖՖ պաշտոնական կայքի հետ հեռախոսազրույցում Արզումանյանը նշեց, որ այժմ Գերմանիայում է, որտեղ պատրաստվում է ծնկի վիրահատության:

Մեկ այլ կենտրոնական պաշտպան՝ Հրայր Մկոյանն այս օրերին Երևանում է: Մկոյանը ՀՖՖ պաշտոնական կայքին տեղեկացրեց,, որ այժմ վերականգնման փուլում է եւ հույս հայտնեց, որ կհասցնի ապաքինվել օգոստոսին կայանալիք Ալբանիա-Հայաստան ընկերական հանդիպումից առաջ: Ակումբային հարցերում դեռևս հստակություն չկա: Մկոյանն ունի մի քանի առաջարկներ տարբեր ակումբներից, բայց վերջնական որոշում դեռ չի կայացրել:

Մեր զրույցի պահին Արտյոմ Խաչատուրովը իր նոր ակումբի՝ «Տիրասպոլի» կազմում պատրաստվում էր Եվրոպա լիգայի «Սկոնտո»-«Տիրասպոլ» մրցավեճին: Առաջին խաղում մոլդովական թիմը պարտություն է կրել 0:1 հաշվով, իսկ Խաչատուրովը մասնակցել է ողջ հանդիպմանը:

Հայաստանի ազգային հավաքականի ևս մեկ պաշտպան՝ Վալերի Ալեքսանյանն այս օրերին Իրանում է: Ալեքսանյանը մեկամյա պայմանագիր է ստորագրել «Ռահ ահան» ակումբի հետ: Ալեքսանյանը ՀՖՖ պաշտոնական կայքի հետ զրույցում նշել է, որ ծանոթ է մի քանի ֆուտբոլիստների հետ, իսկ ակումբի մարզիչն անձամբ է ցանկություն հայտնել Ալեքսանյանին տեսնել իրենց թիմում: Իրանի առաջնությունը կմեկնարկի հուլիսի 24-ին:

Հայաստանի ազգային հավաքականի հարձակվող Յուրա Մովսիսյանը շարունակում է մարզումները «Սպարտակի» կազմում: Երեկ Յուրան թիմակիցների հետ մասնակցել է «Սպարտակի» նոր մարզահագուստի շնորհանդեսին: Այս մրցաշրջանից սկսած՝ Յուրան «Սպարտակում» հանդես կգա 10 համարի մարզաշապիկով:

Կարագանդայի «Շախտյոր» տեղափոխված Գևորգ Ղազարյանը ՀՖՖ պաշտոնական կայքի հետ զրույցում նշել է, որ վերջին օրերին չի մարզվում ակումբի հետ, քանի որ հիվանդացել է ջրծաղիկով: Ղազարյանն ի վիճակի կլինի վերսկսել մարզումները միայն հուլիսի 14-ին, սակայն չի կարողանա մասնակցել Չեմպիոնների լիգայի որակավորման երկրորդ փուլի «ԲԱՏԷ»-ի հետ առաջին հանդիպմանը, տեղեկացնում է ՀՖՖ-ի պաշտոնական կայքը: