Ո՞րն է Սոֆի Դևոյանի երիտասարդության գաղտնիքը (ֆոտո)

Պարուհի, պարուսույց, դերասանուհի, հաղորդավարուհի, ՀՀ վաստակավոր արտիստուհի Սոֆի Դևոյանն օրեր առաջ` հուլիսի 8-ին, դարձավ 64 տարեկան: ArmStar.am-ը մի փոքր ուշացումով շնորհավորեց Սոֆի Դևոյանին և հարցազրույց ունեցավ նրա հետ:

«Ես սիրում եմ իմ ծնունդը և նշում եմ սովորաբար, բայց թատրոնի հետ հիմնականում: Այս տարի թատրոնի իմ ընկերներն այստեղ չէին, այդ իսկ պատճառով որոշեցինք ծնունդս տեղափոխել ամսի 16-ին կամ 17-ին»,- ArmStar.am-ի հետ զրույցում նշեց Սոֆին: Թեև առանձնապես մեծ շուքով այս տարի դեռ չեն տոնել ծնունդը, բայց պարուհին իր ամուսնու հետ միասին ժամանակ է անցկացրել իրենց ակումբում, որտեղ հաճախակի են լինում. «Ամուսնուս հետ միասին երեկոյան գնացինք Ակումբ 11»:

Իր ողջ կյանքի ընթացքում Սոֆի Դևոյանը ստացել է ամենատարբեր նվերներ, բայց խոսակցության ընթացքում մտաբերեց դրանցից ամենաօրիգինալը. «Շատ տարբեր նվերներ եմ ստացել իմ ողջ կյանքի ընթացքում: Դրանցից ամենահիշվողը ստացել եմ տասնյակ տարիներ առաջ` Լոս Անջելեսում: Այն ժամանակ իմ երկրպագուներից մեկն ինձ մի մեծ զամբյուղ էր նվիրել, որն այնքան մեծ էր, որ 6-7 տղամարդիկ հավաքվել էին, որ կարողանային այն ներս մտցնել իմ սենյակ: Այդ զամբյուղում ամեն տեսակի էկզոտիկ մրգեր էին: Այնքա~ն շատ, որ օրեր շարունակ ես ու ընկերուհիներս այդ մրգերն ուտում էինք ու վերջը չէր երևում»,- ծիծաղով հիշեց Սոֆին:

Սոֆին պատմեց նաև, որ իր ծնունդը առիթ է ունեցել տոնելու տարբեր երկրներում. «Մի անգամ տոնել եմ Փարիզում, մի անգամ Պերուում… Առհասարակ հաճախակի այնպես էր ստացվում, որ իմ ծննդյան օրերին մենք համերգների էինք լինում տարբեր երկրներում»: Ի դեպ Սոդի Դևոյանը նվերների մասին խսելիս հիշեց նաև իր «Պարի և հոգու թատրոնի» սաներին: «Նրանք ինձ չեն լսում, սա միակ հարցն է, երբ սաներս ինձ չեն լսում, միշտ բոլոր առիթներին ինձ շնորհավորում են», -ծիծաղելով պատասխանեց Սոֆին:

Բնականաբար սիրելի տատիկին նվերներ են մատուցել նաև թոռնիկները` իրենց մայրիկի` Զարուհի Բաբայանի գլխավորությամբ: «Հարսիկս ինձ շատ օգտակար, շատ լավ նվեր է մատուցել, որը կապված է առողջության հետ: Թոռնիկներս իրենց ձեռքով պատրաստած նվերներ են ինձ մատուցել: Տղաս ևս ինձ շատ օրիգինալ նվեր մատուցեց: Բոլորն էլ շատ ուշադիր են իմ նկատմամբ»,-ավելացրեց Սոֆին:

ArmStar.am-ը պարուհու հետ զրույցի ժամանակ հետաքրքրվեց նաև, թե որն է նրա երիտասարդության գաղտնիքը: Այս 64 տարիները անզոր են եղել որևէ հետք թողնելու Սոֆի Դևոյանի գեղեցկության վրա. «Չեմ կարող ասել, թե որն է իմ երիտասարդության գաղտնիքը: Ամեն դեպքում կարող եմ ասել, որ ես պոզիտիվ մարդ եմ, ես աշխատում եմ ջնջել ամեն վատ բան և փնտրում ու տեսնում եմ միայն լավը: Մարդն առհասարակ պետք է լի լինի սիրով: Նա պետք է կարողանա նաև սեր տալ: Ես լի եմ դրական էներգիայով ու սիրով` մեծի հետ մեծ եմ, փոքրի հետ` փոքր…»,- ավելացրեց Սոֆին: