Երևանում են նաև Պիետրո Մարչելլոն ու Արտավազդ Փելեշյանը (տեսանյութ)

«Ես սովորել եմ լինել լուռ եւ անձայն: Որքան մարդ լուռ է, այնքան ավելի զգայուն են նրա զգայարանները». սա Երեւանում գտնվող համաշխարհային կինոլեգենդի՝ Գոդֆրի Ռեջջիոյի մտորումն է, որ ակամայից պատասխանում է հարցին:

Վերջապես Երեւանում է իտալացի հանրահայտ ռեժիսոր Պիետրո Մարչելլոյի «Փելեշյանի լռությունը» ֆիլմը:

Երեւանում են նաեւ Պիետրո Մարչելլոն ու Արտավազդ Փելեշյանը: Պիետրոն այն եզակի ռեժիսորն է, որին համաշխարհային կինոյի մեծ վարպետը՝ Փելեշյանը վստահել է ստեղծել իր ֆիլմ-դիմանկարը:

«Դա Մարչելլոյի լռությունն է, ոչ թե Փելեշյանի»,-երեկ ասել է Վարպետը: «Այդ վերնագիրը բացատրություն է պահանջում, բայց Մարչելլոն ինձնից օրինակ վերցնելով լռել է»:

«Եղել է մի պայման, որ ինքը ոչ մի բառ չի ասելու տեսախցիկի առջեւ: Դա նրա ընտրությունն էր: Սա կինոպատմության մեջ միակ ֆիլմ-դիմանկարն է, որտեղ հերոսը չի խոսում»,- իր հարցազրույցներից մեկում ասել է Պիետրո Մարչելլոն:

Այս ֆիլմը ցուցադրվել է Վենետիկի կինոփառատոնում՝ Փելեշյանի ներկայությամբ, «Պելո» խաղատան հսկայական դահլիճում, որտեղ ասեղ գցելու տեղ չի եղել: Մարդիկ ուղղակի նստած են եղել աստիճաններին, ինչը Վենետիկում խստիվ արգելվում է անվտանգության նկատառումներով:

Այս ֆիլմը ցուցադրվել է Ռոտերդամում, իտալական մի քանի կինոփառատոններում: Փելեշյանի եւ Մարչելլոյի պայմանն է. ֆիլմը չընդգրկել մրցութային ծրագրերում, որովհետեւ այն ռեժիսորի դիմանկարն է:

«Ինձ զգուշացրել էին, որ Փելեշյանը շատ ինքնատիպ մարդ է: Ես նրա հետ եղել եմ ծայրաստիճան ազնիվ: Փելեշյանն ինձ պայմաններ է առաջադրել. ինչպես նկարահանել, որտեղ նկարահանել եւ այլն: Ես ամեն ինչ մշակել եմ իր ցուցումներով: Ինքն է միշտ ընտրել որտեղ նկարահանել եւ ինչպես: Օրինակ, երբ ինքն այցելում է գերեզմանատուն, իր ուսուցչի շիրիմին: Դա ինքն է պնդել նկարահանել: Նա միշտ իր պայմաններն է թելադրել. օրինակ նկարահանել առանց եռոտանու: Իհարկե, իմպրովիզներ էլ են եղել: Օրինակ, ինքն ասում էր այսօր ես գնում եմ գերեզմանատուն, կամ այսօր կարելի է տանը, բնակարանում նկարահանել: Ձայնային ռեժիսորներին Փելեշյանի պահանջով անմիջապես հեռացրեցին նկարահանման հրապարակներից, հետո ես նրանց հետ առանձին գնացել եմ նույն վայրերը ու նկարահանել եմ ձայներն արդեն առանց Վարպետի ներկայության». սա հատված է Պիետրո Մարչելլոյի անչափ հետաքրքիր հարցազրույցից ռուսական մամուլին:

Երկար սպասված պրեմիերան այսօր, «Ոսկե Ծիրանում»…

Աղբյուրը` webtv.am