Մրցում են համայնքային արձագանքման կամավորական թիմերը

Հուլիսի 12-ին Շիրակի մարզի Առափի համայնքում Հայկական Կարմիր խաչի ընկերությունն անցկացրեց Համայնքային արձագանքման կամավորական 14 թիմերի առաջին մրցումը: Այն ղեկավարվում էր Շիրակի մարզի փրկարարական վարչության կողմից:

Միջոցառմանը ներկա էին Հայկական Կարմիր խաչի ընկերության նախագահ Մխիթար Մնացականյանը, ՀՀ Արտակարգ իրավիճակների նախարար Արմեն Երիցյանը և Շիրակի մարզպետ Ֆելիքս Ցոլակյանը:

Բացման արարողության ժամանակ ողջունելով կազմակերպիչներին ու մասնակիցներին' ԱԻ նախարար Արմեն Երիցյանն ասաց.
- Մենք շատ բարձր ենք գնահատում համագործակցությունը Հայկական Կարմիր խաչի ընկերության հետ' աղետների ռիսկի նվազեցման ոլորտում: Համայնքային արձագանքման կամավորական թիմերի ձևավորումը մեծ նշանակություն ունի համայքների խոցելիությունը նվազեցնելու գործում:

ՀԿԽԸ նախագահ Մխիթար Մնացականյանը, շնորհակալություն հայտնելով ԱԻ նախարարությանը' նախաձեռնությանն աջակցելու համար, նշեց.
- Ես ողջունում եմ կամավորական թիմերի անդամներին, քանի որ նրանց կամավոր մասնակցության շնորհիվ են կայացել այս թիմերը, որոնք անհրաժեշտության դեպքում կկարողանան պատշաճ արձագանքել' արտակարգ իրավիճակի դեպքում:

Թիմերը ցուցադրեցին իրենց գիտելիքներն ու հմտությունները և իրականացրեցին գետանցում, օգնության ցուցաբերեցին տուժածին, անցան ԱՌՆ թեսթավորում, պայմանական տուժածներին դուրս բերեցին փլատակից և վթարված ավտոմեքենայից:

2010 թվականից Հայկական Կարմիր խաչի ընկերությունը Շիրակի մարզում իրականացնում է աղետների ռիսկի նվազեցման ոլորտում «Կառուցենք անվտանգ տեղական համայնքներ Հարավային Կովկասում» ծրագիրը:

Դրա շնորհիվ տարիների ընթացքում հնարավոր է դարձել Շիրակի մարզի 14 գյուղական համայնքներում ձևավորել Համայնքային արձագանքման կամավորական թիմեր՝ Շիրակի փրկարարարական վարչության, մարզային և տեղական իշխանությունների հետ սերտ համագործակցությամբ: Ստեղծված թիմերի համար պարբերաբար անցկացվել են դասընթացներ, վերապատրաստումներ և ուսումնական խաղ - վարժանքներ, ինչպես նաև տրամադրվել է թիմային և անհատական գույք՝ արտակարգ իրավիճակի դեպքում օպերատիվ արձագանք ապահովելու համար: