Այսօր արգենտինահայ բանաստեղծուհի Ալիսա Կիրակոսյանի ծննդյան օրն է (տեսանյութ)

Քո աչքերի հետ
Ես հավերժաբար զրույց եմ արել,
Սակայն եղել եմ ուրիշ մաշկի մեջ,
Ուրիշ երկրի մեջ,
Ուրիշ մի վայրում...
Բայց իմ զրույցը քեզ հետ է եղել,
Քո աչքերի հետ:
Դու նա ես, որն իր բացակայությամբ
Դատարկ է թողնում իմ էությունը:
Նա, ով արարվեց,
Որ ունայնության այս մթնոլորտում
Մենակ չմնամ:
Դու նա ես,
Ով ինձ ուրիշ մի դարում
Ասաց` սպասիր…
Սակայն այս դարում,
Ների’ր, չեմ կարող
Արդեն սպասել:

Ալիսա Կիրակոսյան

Հայ բանաստեղծուհի Ալիսիա Կիրակոսյանը ծնվել է 1936 թ. հուլիսի 13-ին՝ Արգենտինայում: Գրել է իսպաներեն, իտալերեն, հետո նաև՝ հայերեն և անգլերեն:

Սովորել է Բուենոս Այրեսի ազգային համալսարանի իրավաբանական ֆակուլտետում։ 10 տարի խաղացել է արգենտինյան թատրոնում: ԱՄՆ-ում բնակվում է 1971 թ.-ից: ԱՄՆ-ի իսպանախոս Գրողների միության պատվավոր նախագահն է: Կիրակոսյանի պոեզիայի թեմատիկ առանցքն են կազմում սերը, մայրությունը, հայրենիքը և փիլիսոփայական խոհը:

Ես վախենում եմ
«Սեր» բառը ասել,
Զի նախազգում եմ,
Որ սիրուց անդին
ամայություն է...
Ես վախենում եմ, որ սերը միայն
Բառ լինի,
որ ես
Ճաշակեմ բառն այդ
Եվ քաղցած մնամ:
Ու ես ինքս ինձ օգնում եմ հիմա,
Որ այս աշխարհում
պահպանեմ սերը,
Որն ամենքինն է
Ու իմն է միայն:
Եվ դա համարյա այն միակ բանն է,
Որ իմն է միայն:
Ես վախենում եմ դարձյալ ու դարձյալ,
Որ սերն աշխարհում
ամեն ինչ լինի,
Որ սերն աշխարհում
չլինի ոչինչ...