Այսօր շվեդ կինոռեժիսոր Ինգմար Բերգմանի ծննդյան օրն է (տեսանյութ)

Նշանավոր շվեդ կինոյի և թատրոնի ռեժիսոր, սցենարիստ, պրոդյուսեր, գրող, դերասան Ինգմար Բերգմանը ծնվել է 1918 թվականին հուլիսի 14-ին, Շվեդիայի Ուփսալա քաղաքում։ Հայրը` Էրիկ Բերգմանը լյութերական եկեղեցու հովիվ էր, մայրը` Կարին Ակերբլոմը բուժքույր: Ունեցել է մեկ եղբայր` Դագը և քույր` Մարգարետա։ Նրանց հայրը երեխաներին դաստիարակել է կրոնական խիստ ավանդույթներով։ Չնայած դրան Բերգմանը մի առիթով ասել է որ նա կորցրել է իր հավատքը 8 տարեկանից: Բերգմանը թատրոնի և կինոյի հանդեպ հետաքրքրություն է դրսևորել դեռևս մանուկ հասակից:

1934 թվականին նա մեկնում է Գերմանիա այնտեղ անցկացնելու ամառային արձակուրդները ընտանիքի ընկերների հետ։ Այնտեղ նա մասնակցել է նացիստական ցույցի, որի ժամանակ տեսել է Ադոլֆ Հիտլերին: 1937 թվականին նա ընդունվում է Ստոկհոլմի համալսարանի քոլեջ, որտեղ ուսումնասիրում է արվեստ և գրականություն։ Սովորելուն զուգահեռ Բերգմանը մասնակցում է ուսանողական թատերական ներկայացումներին:

Այդ տարիներին նա հոր հետ ունեցած տարաձայնություններից հետո բաժանվում է ընտանիքից, այդ բաժանումը երկար է տևում։ Ուսման տարիներին նա արդեն գրում է մի քանի պիես, նաև օպերաներ և արդեն աշխատում է թատրոնում որպես ռեժիսորի օգնական։ 1942 թվականին նա բեմադրում է իր գրվածքներից մեկը' «Կասպերի մահը»: Ներկայացումից հետո նրան աշխատանքի են հրավիրում «Svensk Filmindustri» ընկերություն, որպես սցենարիստ:

«Օսկարի» և բազում այլ կինոմրցանակների դափնեկիր է, նրա ֆիլմերից երեքը ստացել են Օսկար մրցանակ: Ավելի քան վաթսուն ֆիլմերի ռեժիսոր է: Նրա հանրահայտ ֆիլմերից են. «Ամառային գիշերվա ժպիտները», «Յոթերորդ կնիքը», «Մորու բացատը», «Աղջկական աղբյուր», «Մութ ապակու միջով», «Ձմեռային լույս», «Գայլի ժամը», «Շշուկներ և ճիչեր», «Աշնանային սոնատ», «Ֆաննին և Ալեքսանդրը» և այլն... Բերգմանը համարվում է փիլիսոփայական, հոգեբանական դրամաների վարպետ, ում սիրված թեման էր կյանքի ճգնաժամը:

Ингмар Бергман «Улыбки летней ночи»