ԱՄՆ-ում սևամորթ պատանուն սպանողի արդարացումից հետո բախումներ են սկսվել ոստիկանության հետ

ԱՄՆ-ում սևամորթ բնակչության խաղաղ բողոքի ակցիաները, որոնք կազմակերպվել էին սևամորթ պատանուն սպանած 29-ամյա Ջորջ Ցիմմերմանի արդարացման դատավճռից հետո, վերածվել են ոստիկանության հետ բախումների. գրում է Reuters-ը: 

Նյու Յորքում ձերբակալվել է ավելի քան 20 ցուցարար, ովքեր ակցիա էին կազմակերպել Թայմս Սքվերում: Հավաքված մի քանի հազար ցուցարարները իրենց հագին վերնաշապիկներ են կրում, որոնց վրա մակագրված է. «Կրակի՛ր ինձ, ես սևամորթ եմ» լոզունգը: 

Զանգվածային բողոքի ցույցերը տեղի են ունենում այնպիսի խոշոր քաղաքներում, ինչպես՝ Ֆիլադելֆիան, Չիկագոն, Մայամին, Սան Անտոնիոն Լոս Անջելեսը: 

Նշենք, որ Թրեյվոն Մարտին անունով սևամորթ պատանին սպանվել էր 2012թ. փետրվարի 26-ին: Տեղաբնակ իսպանալեզու Ջորջ Ցիմմերմանը զանգահարել էր ոստիկանություն և հայտնել «կասկածելի  անձնավորության» մասին: Ոստիկանությունը խնդրել էր չհետապնդել պատանուն և հերթապահ մեքենա էր ուղարկել դեպքի վայր: Սակայն Ցիմմերմանը չէր հետևել խորհուրդներին և կրակել էր պատանու վրա, որից հետո հայտարարել էր, որ գործել է ինքնապաշտպանական նկատառումներից ելնելով: Այս շաբաթ օրը Ֆլորիդա նահանգի դատարանը արդարացրել էր Ցիմմեմրմանին`անմեղ ճանաչելով նրան ոչ դիտավորյալ սպանության մեջ: