Հուսով եմ՝ Հայաստանի հավաքականին կհաջողվի պայքարել Բրազիլիայի ուղեգրի համար. Օզբիլիս

Հայաստանի ազգային հավաքականի և «Կուբանի» 23-ամյա ֆուտբոլիստ Արաս Օզբիլիսը izvestia.ru-ին տված հարցազրույցում խոսել է Հայաստանի հավաքականի և «Կուբանի» մասին: Ֆուտբոլիստը մասնավորապես նշել է.

«Առաջին տուրից հետո մարտական եմ տրամադրված: Իհարկե մեզ շատ բարդ մրցաշրջան է սպասվում: Անցած տարի հիանալի արդյունքի հասանք: Ունենք շատ լավ թիմ և նոր գլխավոր մարզիչ, ում գլխավորությամբ մենք նույն ջանասիրությամբ աշխատում ենք: Իհարկե Եվրոպայի լիգայի խմբային փուլ դուրս գալը հեշտ չի լինի, քանի որ որակավորման երրորդ տուրից հետո մեզ ուժեղ մրցակիցներ բաժին կընկնեն, սակայն մինչ այդ պետք է հաղթահարենք այս փորձությունը: Ֆուտբոլ խաղում են 90 րոպե, և այդ ընթացքում ամեն ինչ կարող է պատահել: Կցանկանայի նոր մրցաշրջանում հեղինակել այնքան գոլ, որքան հնարավոր է և որքան պետք է՝ ակումբի հաղթանակների համար: Իրականում գոլը ինձ համար մեծ նշանակություն չունի: Կարևորը «Կուբանը» անհրաժեշտ միավորներ հավաքի: Մեր խնդիրն է ավելի վատ հանդես չգալ, քան նախորդ մրցաշրջանում»:

Անդրադառնալով կրասնոդարյան ակումբը լքելու հնարավոր տարբերակին՝ Օզբիլիսը նշել է. «Երբեք մի ասա երբեք՝ հատկապես ֆուտբոլում, որտեղ ոչնչում վստահ լինել չես կարող: Ինձ շատ է դուր գալիս «Կուբանը», հատկապես երկրպագուները: Սակայն ֆուտբոլում ամեն ինչ հնարավոր է, կապրենք կտեսնենք: Չեմ կարծում, որ Սիսեն մեզ մոտ է տեղափոխվել փողի համար, նա թիմին մեծ օգուտ կբերի: Հաճել է նման մակարդակի ֆուտբոլիստին տեսնել «Կուբանում»:

Անդրադառնալով Հայաստանի հավաքականին՝ ֆուտբոլիստը հավելել է. «Իհարկե մեր թիմին չի բավականացնում կայունությունը, սակայն մենք աշխատում ենք այդ ուղղությամբ: Վերջին արդյունքները մեզ դրական զգացմունքներ պարգևեցին: Հուսով եմ, որ մեզ կհաջողվի պայքարել Բրազիլիայի ուղեգրի համար», - նշել է Օզբիլիսը: