Պիկասոյի, Գոգենի, Մոնեի և Մատիսի գողացված կտավներն այրել է գողի մայրը

Ռոտերդամում աշխարհահռչակ Kunsthal թանգարանից Պիկասոյի, Գոգենի, Մատիսի, Կլոդ Մոնեի, Լյուսյեն Ֆրեյդի կտավների կողոպուտի մեջ մեղադրվողի մայրը պատմել է, որ այրել է իր որդու կողմից թալանված բոլոր արվեստի գործերը. գրում է Associated Press-ը` հղում կատարելով Ռումինիայի իրավապահ մարմիններին:

Ինչպես խոստովանել է մեղադրյալի մայր Օլգա Դոգարուն, 2013-ի հունվարին` իր որդու ձերբակալումից հետո, նա վախեցել է և որոշել ոչնչացնել իրեղեն ապացույցները: Նա դրել էր 7 գողացված կտավները ճամպրուկի մեջ և թաղել դրանք Ռումինիայի Կարակլիու գյուղի գերեզմանատանը: 1 ամիս անց, երբ գյուղում ոստիկանությունը խուզարկություններ էր սկսել, նա հանել էր ճամպրուկը և այրել իր տան վառարանում:

Այս պահին փորձագետներն ուսումնասիրում են կնոջ վառարանում գտնված մոխիրի պարունակությունը: Կտավների ճակատագրի մասին որևէ մեկնաբանություն չի կարելի անել, քանի դեռ չեն ավարտվել փորձագիտական անալիզները. նշում են դատախազությունից: 

Նշենք, որ Նիդեռլանդներում գտնվող Kunsthal թանգարանի կողոպուտը տեղի էր ունեցել 2012թ. հոկտեմբերին: Անհայտ անձինք մտել էին վթարային մուտքով և 2 րոպեի ընթացքում գողացել 7 կտավ: Փորձագետները թալանված նկարների ընդհանուր արժեքը գնահատում են 200 մլն եվրո: