Ինձ համար առաջնահերթն այն է, որ իմ հայրը, եթե պետք է պատիժ կրի, կրի Հայաստանում. Լիլիթ Հարությունյան

«Շուրջ 20 տարուց ավել է՝ վարում է նման մեքենաներ, և երբևիցե չի եղել նման դեպք, որ ավտովթարի ենթարկվի»,-այսօր լրագրողների հետ հանդիպման ժամանակ ասաց Մոսկվայում հուլիսի 13-ին տեղի ունեցած ավտովթարի պատճառով ձերբակալված ՀՀ քաղաքացի Հրաչյա Հարությունյանի դուստրը՝ Լիլիթ Հարությունյանը, հավելելով, որ հոր համար առաջնահերթ եղել է աշխատելը, և նա երբևիցե չի բողոքել աշխատանքի համար։

«Անցած տարի ևս մի քանի ամսով գնացել է Ռուսաստան, վերադարձել. այս տարի գնացել է այնտեղ 3 ամսով։ Վթարի մասին մենք տեղեկացել ենք այնտեղ բնակվող մեր բարեկամներից։ Ըստ փաստաբանի տեղեկությունների՝ վթարի պատճառը եղել է արգելակների անսարքությունը»,- ասաց Լիլիթ Հարությունյանը։

Վերջինիս խոսքերով՝ իր հայրը 90-ականներին կամավոր գնացել է կռիվ՝ պաշտպանելու հայրենիքը։

«Ինձ համար միևնույն է բարոյական վնասը, ինձ համար առաջնահերթն այն է, որ իմ հայրը, եթե պետք է պատիժ կրի, կրի Հայաստանում»։