«Չգիտես ինչու՝ շատերը պապայիս «բոբո» են պատկերացնում». Սիլվա Հակոբյան (ֆոտո)

Սիլվա Հակոբյանը որոշել է իր հարազատ քաղաքի՝ Վայքի 55 ամյակի կապակցությամբ բարեգործական համերգ տալ:

ArmStar.am-ի հետ զրույցում նա ասաց.

«Համերգի ընթացքում հնչելու է մոտավորապես քսանյոթ երգ, իմ երգացանկից կլինեն այն երգերը, որոնք արդեն սիրվել են, կլինեն նաև պրեմիերաներ: Մեր թիմն ակնկալում է, որ շատ ակտիվ և ուրախ համերգ է լինելու»:

Ակտիվորեն նոր տեսահոլովակներ ներկայացնող երգչուհու գրեթե բոլոր երգերը սիրվում են, չնայած լինում են դեպքեր< երբ մեկնաբանությունները միայն երգին չեն վերաբերում, այլև երգչուհու անգլերենի հնչեղությանը, ինչը եղավ Leave a light on երգի ժամանակ.

«Ես չեմ հետևում մեկնաբանություններին, հետևում է իմ հայրը և իմ թիմը, իսկ անգլերեն երգելուս մասին ասեմ, որ յուրքանչյուրն էլ կարող է փորձել երգել անգլերեն: Իմ ակցենտի վրա շատ են աշխատում մասնագետները, երբ առաջին անգամ ձայնագրեցի այս երգը, ակցենտը շատ էր, այդ պատճառով էլ երկրորդ անգամ եմ ձայնագրվել»:

Զրույցի ընթացքում ներկա էր նաև Սիլվայի հայրը.

«Սիլվան ցանկացած ասպարեզում առաջ գնալու մեծ հեռանկար ունի, եթե կա մեկն, ով կասկածում է, թող գա մեզ հետ մրցի, իսկ անգլերեն երգում է ու պետք է երգի, մեր գործը պահանջում է, որ նա երգի անգլերեն, իսկ այն մարդիկ ովքեր կասկածում են և մտածում, որ Սիլվան ակցենտով է երգում, թող մի հատ գան ու մեզ ցույց տան էդ ակցենտը», -ավելացրեց Հակոբը:

Սիլվայի հաջորդ երգը հայալեզու է լինելու և կոչվելու է «Հարսի պար»: Ինչպես կատակով նշեց Հակոբը` դա նոր խոսք է հարսի պարերի մեջ, իսկ Սիլվան էլ ավելացրեց. «Հարսի պար ասելով ավելի շատ պատկերացնում են մեր ավանդական հարսի պարը, բայց սա ավանդականից տարբերվելու է և կարծում եմ կսիրվի»:

Սիլվան այն երգչուհիներից է, ում ակումբերում, մասսայական վայրերում, որտեղ ներկա են հայկական շոու բիզնեսի ներկայացուցիչները, անհնար է տեսնել. «Մենք մեզ այդ տեսակ մարդ չենք համարում, դրա համար նման վայրեր չենք հաճախում, փորձում ենք իհարկե անհասանելիությունն ապահովել, չնայած ես ինքս շփվող մարդ եմ»,- նշեց Սիլվան, իսկ Հակոբն ավելացրեց.«գլամուռն ու «տուսովկան» մեր բանը չի»:

Չնայած երգչուհուն երեկույթներին և միջոցառումներին անհնար է տեսնել, բայց ֆեյսբուքում նա բավական ակտիվ է և ներկայանում է Silvia Moon անունով: Սկզբում Սիլվան ֆեյսբուքում գրանցվել է ընկերների ու հարազատների հետ շփվելու համար, սակայն հետո, երբ արդեն ցանկացավ էջը հասանելի դարձնել նաև երկրպագուների համար, իր վիրտուալ անունի «գերին մնաց». «Այնքան էի փոխել անունները, որ այլևս չկարողացա փոխեմ, քանի որ ֆեյսբուքը թույլ է տալիս երեք անգամ փոխել ու այդպես էլ մնացի Silvia Moon»: Այս անունը երգչուհու երկրպագուներին շփոթության մեջ է գցում և Սիլվան խոստացավ, որ անպայման մի ելք կգտնի:

Վերջին շրջանում հաճախ էր խոսվում, որ երգչուհին նշանվել է: Սակայն պարզվում է` սա ընդամենը հումոր էր. «Մենք պարզապես որոշեցինք նախատոնական հումոր անել, ես համերգներից մեկի ժամանակ մատանին ձեռքիս լուսանկարվեցի ու տեղադրեցի ֆեյսբուքում: Իսկ երբ այդ ամենի մասին պատմեցի ամսագրերից մեկի խմբագրին, նա առաջարկեց նյութ պատրաստել, թե իբր ես նշանվել եմ: Բայց եթե իմանայի, որ այդքան ճակատագրական է լինելու, հաստատ այդ քայլին չէի դիմի: Այդ նյութից հետո այնքան մարդիկ էին զանգահարում, գրում: Անգամ այն մարդիկ, ովքեր ինձ լավ ճանաչելով տեղյակ էին, որ չեմ նշանվել, զանգում և շնորհավորում էին»,- հիշում է Սիլվան: «Եթե նշանվեմ, ես ինքս կհայտարարեմ դրա մասին, իրականում չկա նման բան»:

«Այդ օրն ամենաաերջանիկ մարդը ես կլինեմ»,- չդիմացավ ու ժպտալով միջամտեց երգչուհու հայրը:

«Չգիտես ինչու՝ շատերը պապայիս «բոբո» են պատկերացնում, բայց պապաս ինքն է հաճախ հարցնում, արդյո՞ք չեմ ուզում ամուսնանալ: Իսկ ես դեռ պատրաստ չեմ»: